Ka Samla Marbiang Khongwir, ka Samla kynthei ba nyngkong ban ialam ia ka KSU Delhi Unit

Shillong: Ka Khasi Students’ Union (KSU) Sengkmie hynnin ka sngi, ka la ioh ban pynskhem biang ia ka shnat trei kam ha ka nongbah New Delhi kaba la long ha 9-APJ Abdul Kalam Road, New Delhi ha kaba ka Samla (Kong) Marbiang Khongwir, ka la shim ia ka kam President bad kan dei ruh ka sien ba nyngkong ba ka samla kynthei kan shim ban tyngrong iaka lyngkor bad ban ialam ia ka seng khamtam ha Nongbah Delhi.

Ha kane ka sngi la don ruh ka jingia kynduh lang ki samla Khasi kiba pule bad ba trei ha Nongbah New Delhi, kaba la pynlong ruh da ka Unit bad la ia don ryngkat ruh U Samla Lambokstar Marngar, President Sengkmie uba long ruh u Kongsan, U Samla Manly Nongpluh, Finance Secretary Sengkmie u Symbud Kongsan, u Samla Ruben Najiar, CEC Member ka Sengkmie, U Bah Kynpham V. Kharlyngdoh, muktiar ka Supreme Court bad U President ba nyngkong ka Delhi Unit bad kiwei kiwei ki riew rangbah bad ki longkmie longkpa kiba pynshit pynsngain ha katei ka sngi ha kaba ki samla Khasi ba don ha Nongbah New Delhi ki la ia tuid ban ia ithuh para doh para snam.

Ha ka jingkren kum u kongsan u Samla Lambokstar Marngar u la ai ka kyntien kyntu kynpham ia ki samla ba wan pule bad ba trei ha ka Nongbah New Delhi ba kim dei ba pynleh nohei ia ka jingthmu bad ka thong bad ban kynmaw ruh iaka akor ka burom bad ka thymmei ba ki wan. U la iaroh iaka KSU Delhi kaba dang iai khie rasong haduh kane ka por bad ki daw baroh ka dei namar ba dang don ki samla kiba don jingkitkhlieh bad ba ki samla bad ka jaitbynriew ki shaniah bad ki ngeit tylli ha kane ka Seng bad khamtam eh ba kum ka seng kaba peit kaba khmih iaki samla pule bad iaki samka kiba wad kam wad jam jong ka jaitbynriew. U la ai ruh ki kyntien kyrkhu kyrdon ia ka Unit ba kan nangkiew shakhmat ha baroh ki kam. Shuh shuh u la kyntu iaki samla ba ha kiba bun ki jingtrei bun bah ki diengpynkiang bad ki ban wohkjat hynrei ngim dei ban sngew phylla ia kata bad ngi dei ban iaid shakhmat.

Ha kane ka sngi la ioh ruh ka jingkren na U Symbud Kongsan, Samla Manly Nongpluh u ba la kyrkhu kyrdoh bad ai jingiaroh iaka Samla Marbiang Khongwir kaba dei ruh ka nongkitkam ka Girls’ Wing ha Shillong bad dkhot ka Laban Circle bad ha kaba ka Laban Circle ka la pynkup burom ruh ia ka, hadien ba ka la shimti iaka kam President ka Delhi Unit. U la pynkynmaw ruh kumno ka Seng ka la iaid ha ki 43 tylli ki snem naka por shaka por watla bun ki jingtynjuh kiba har rukom.
La ioh ruh iaka jingkren na U Bah Kynpham V Kharlyngdoh, Muktiar ka Supreme Court bad u President ba nyngkong ka Delhi ha kaba u la ai mynsiem iaki Samla kiba wan pule bad trei ha New Delhi bad u la kyntu iaki ban long kiba ia tylli bad kynmaw iaka identity kum ka jaitbynriew. U la ai nuksa ruh baka KSU Delhi ba ka long kum ka iing jngai nala iing. U la pynkynmaw ruh ba kumno la ioh ban pynlong nyngkong iaka KSU ha kane ka Nongbah New Delhi ha u snem 2014 dei namar ka jingdon ki para samla kiba don ka jingkitkhlieh iaka Ri bad iaka jaitbynriew bad kiba kwah ba kiwei ruh kin kiew lang bad tynrong lang iaka jingdon kam ki para doh para snam bad kiba shem jynjar ha kane ka Nongbah Delhi.
Ki nongkitkam ka KSU Delhi Unit jong u snem 2019-2020 ki long kumne:

1. President – Samla (Kong) Marbiang Khongwir
2. Vice-President – Samla Wallam K Nongsiej
3. General Secretary – Samla J.Mathew Tangsong
4. Joint Secretary – Samla (Dr.) Bapynsuk Nohwir
5. Finance Secretary – Samla (Dr.) N Nongtdu
6. Asst. Finance Secretary – Samla (Dr.) A. Syiemiong
7. Organising Secretary – Samla Donbok Wanniang
8. Education Secretary – Samla B. Umdor
   Bad kumba 30 ngut ki dkhot kiba la pyniasoh bad ka seng.