Ka samla Lawanda Diengdoh kum ka nongjop ha ka Ri Bhoi Idol

Nongpoh: Ha kaba kut noh ka Ri Bhoi Idol, ka Lawanda Diengdoh na ka shnong Mawhati, ka la long kum ka nongjop ne ka nongrwai ba tbit tam ha ka Grand Finale jong ka jingiakop rwai Ri-Bhoi Idol 2019, kaba la pynlong da ka Ri-Bhoi Entertainment Society.
Ha katei ka Grand Finale, kaba la long hynnin ka sngi ha Madan Pahamsyiem, ki la don haduh 16 ngut ki nongiashim, kiba la poi shaduh ka thup phainal jong katei ka jingiakop, hynrei napdeng kitei baroh ia ka nam nongjop la rah da katei ka samla na Mawhati, ia ka kyrdon ba ar la ioh da ka Jesicca Kharkrang na Umiam bad ia ka kyrdan balai la ioh da ka Morialda Lyngdoh kaba dei na ka Umden Mission.
Kiba la wan shakhi ha katei ka sngi, ki kynthup ia u Dr. DD Lapang nongaibuit ba rangbah ka sorkar jylla, u Pa’iem Wanphrang Syiem Sordar ka Nongpoh Elaka, ki nongialam sengbhalang, ki ophisar sorkar, ki tyngshop bad puron ba pawnam ka jylla bad kiwei kiwei ki riew rangbah ryngkat ki nongïalam ka Ri-Bhoi Entertainment Society ba kynthup ia u Bah Rijied Khymdeit lem bad kiwei.
Haba phai sha ki khusnam, ka samla Lawanda Diengdoh kum ka lahduh ka la khur ia ka song pisa kaba T.30,000/- ryngkat ka momento, ka Jesicca Kharkrang kala khur ia ka song pisa kaba long T.20,000/-, katba ka Morialda Lyngdoh kaba la wan ha ka kyrdan balai, ka la khur ia ka song pisa kaba long T.15,000/-. Ha kajuh ruh ka por la sam ruh ia ki consolation prize sha baroh ki nongshim bynta ha katei ka jingiakop.