Ka Samla kaba nga ibha ka la ioh da u rangdajied, ngam pat lap kaba kham bhabriew:Dr.Pariong

Shillong,6 Naiwieng:
Hadien ba la mih ki khubor ba ka la don ka jingiakren hapdeng u nongialam ba rangbah duh ka seng HSPDP u bah Ardent M Basaiawmoit bad u Dr.Adviser Pariong kaba u bah Ardent la pyrshang ban tan noh ia u sha ka seng HSPDP kaba dei ka thymmei seng saiñ pyrthei ba u Dr.Pariong u la paw pyrthei nyngkong eh. U Rupang mynta ka miet u la ioh ban ia kren bad u Dr.Pariong lyngba ka phone ban kylli hato la ka dei ne em kaba shisha ba ka don kaba kum katei ka jingiakren hapdeng jong u bad u bah Ardent, “U bah Ardent u dei u paralok ba nga ia ithuh la slem naduh ka por ba dang ia long MDC lang, ngi shu ia kren paralok kumto” ong u Dr.Pariong.
Haba la kylli biang haei ki ia kynduh bad katno kynta ki ia shongkai ia thuh khana bad u bah Ardent, “Em u shu wan iaid lynti nangne na Clinic jong nga u shu rung noh shiphang eh , ngi ia kren tang kumba 5 minit eiei kata ruh kam dei ka jingiakren shisha ka dei tang ka jingiakren paralok kum u paralok barim bad kata ka jingiakren ruh kam long haba rieh hynrei ka dei haba shit ba paw ba iohi lut ki briew” ong biang u Dr.Pariong uba la bynrap biang ba katei ka por ba u bah Ardent u wan ruh ka dei artad ka por ba ki bun bha ki nongwan shim dawai bad ba u bunkam palat.
U Rupang u la kylli biang hato lada kam dei ka jingiakren bad u bah Ardent ruh, la ki la don ne-em ki nongialam ka HSPDP kiba la leit ban ia kren bad u ban khroh ban wan phai biang sha katei ka seng, “Nga dei u politishian bad ha ka politik haba ki iohi ba nga laitluid kumne te mano manor uh kiba wan hi te. La kylli biang hato haba kam pat shai la u don sha kano kano ka liang ruh hynrei haduh mynta kaba paw hi u dei u Congress –ngi lah ban shim beit ia u kum u Congress u Dr.Pariong u la jubab “Kumba ka paw shabar te shapoh ruh nga long hi kumta”.
Shuwa ban pynkut ia ka jingiakren u Rupang u la kylli biang hato u don jingut ne-em ban don noh bad kawei pat ka Party ne u la rai kut ba un shongkhop beit hapoh ka sem jong ka Congress, “ Yn ong kumno keiñ ka samla kaba nga la ibha ruh ka la ioh da u Rangdajied u Rangkynsai uba ka la ibit ibiang te yn ong shuh kumno”. Hato phin dang kthong beit ia katei ka samla kaba ibha hynrei kaba la ioh noh shawei ne phin wad noh shawei? Kylli u Rupang “ Haduh mynta te ngam pat lap ka thei samla kaba kham bhabriew kaba nga i shoh biej” pynkut u Dr.Pariong haba siat pharshi ia ka seng Congress.