Ka rynsan ialap VAB ha Mawlai

Shillong, 19 Jylliew:
Ki Lai tylli ki kyn hun kaba la tip kum ka Sur Ki Samla Mawlai, ha ryngkat ka jingiatreilang bad ka FKJGP, KSU Mawlai Circle kan pynlong ia ka rynsan ia pyni nia lashai ka 20 tarik u jylliew ha Stand Bus Mawlai Phudmuri ha ka por 1 baje mynsngi ba ki riew shemphang khamtam ki riew sain pyrthei kiba la heh la san la kha la pun ha Mawlai kin leit ban pyni ia ki nia ki jutang jong ki halor ka Village Administration Bill, 2014 bad 2015. Hynrei la ong ba hadien ka jingbym treh leit ia shim bynta u bah Process T Sawkmie, MDC ka Mawlai, u bah Pynshngain N Syiem CEM KHADC, u bah James Sylliang, MDC ka Mawhati katei ka rynsan pyni nia kan kylla noh kum ka rynsan ialap VAB. La ong ba ha katei ka rynsan kiba la thikna ban poi ki long u bah Ardent M Basaiawmoit, u bah Pyndap Saibon, President KHNAM bad ki MDC ka KHNAM , la ong ba kitei ki MDC kiba don ha ka Liang Pyrshah ha KHADC ki la pynkhreh bha ia la ki nia ki jutang ban kren ha katei ka rynsan, hynrei namar ka jingbym treh leit ki MDC ka PDF la iathuh ba ki lah ban pynkylla noh ia ki jingkren jong ki, ha kaba na ka ia pyni nia kan poi noh sha ka jingialap VAB ka bym da ia pher than na ka jingialang kaba u bah Adelbert Nongrum ryngkat ki paralok shah thngan jong u ki la pynlong ha Sohra, Jaiaw bad Mairang. Shuh shuh ki lad khubor ki la iathuh ba ha katei ka rynsan ka ban long ha Phudmuri, kin kham duna ki jingkren VAB hynrei kaba kham bun hi ka dei ka jingkren kob sarong bad ka jingkren kynthoh ia ka jingbym nud ki MDC ka PDF ban leit sha katei ka jaka ban kren sha u paidbah.