Ka rukom sumar ia ka snieh doh ha ka por lyiur

Kong Linda Kongwang

Ka aiom lyiur ka dei ka aiom, ha kaba ngi lah ban leh kmen shabar na la iing, ban phong ia ki jain pyngngad bad ban jngi ha ki um ki wah.Hynrei ka jing khluit bad jingshit jong ka sngi ka lah ban pynsniew noh ia ka sniehdoh ba itynnad jongphi.

Ka jing kylla jongka suinbneng ka pyn long ia ka sniehdoh jongphi ban tyrkhong bad sti noh bad ka ialam sha ka jing shah set noh ki thliew snieh haki umsyep, ki pui pui bad ki jaboh balang haka met jongphi. Namarkata phi dei ban sumar bha ban ioh ia ka sniehdoh kaba bha bad shai.
Ban ioh ia ka sniehdoh kaba bha, ka dei kaei kaei kaba ngi kwah ban ioh ha baroh ki saw aiom.Ka jingdon ia ka sniehdoh kaba bha kan pyn kmen bad pynheh mynsiem shibun ha baroh ki liang. Lada phi don ia ka sniehdoh kaba tyrkhong ne bym itynnad ban peit, ka jing sumar hi ha iing kan dei kaba bha tam.

Kane ka jing thoh ka pyni kumno phin sumar hi ha iing ban ioh iaka sniehdoh kaba bha bad shai khamtam hakine ki por lyiur.Katto katne ki mat ba lah ban sumar hi ha iing:-

1. Ka jynhaw um (steaming) – ka jing sumar ia ka met da ki jynhaw um ba khluit ka long kaba bha tam eh ban ioh ia ka sniehdoh kaba khuid.Leh ia kane la kumno kumno arsien shitaiew kan iarap ha ka ban plied biang ia ki thliew syep bad ruh ban weng iaki pui pui kiba don ha ka met jongphi. Namar kata ka jing sumar lyngba ki jynhaw um kan pyn ioh iaka sniehdoh kaba shai bad khuid.
2. 2. Ka rukom pynkhuid ia ka sniehdoh – Ban ioh ia ka sniehdoh kaba khuid, phi lah ban pyndonkam da u toner. Lyngba u toner phi lah ruh ban weng iaki jingtah pyn bha briew (makeup) na ki dur jongphi. Kan bha shibun lada phin shna hi ia u toner ha iing da ki um tiewkulab(Rose water) bad ka glycerin. Phi lah ban leh ia kine man la ka ka miet, kan pynjah iaki khniang kiba mih haka dur jongphi bad ai iaka sniehdoh kaba shai bad khuid.
3. 3. Kiar na kaba mih na iing mynsngi – Hooid baroh baroh ngi tip ba ngi donkam ban mih na iing na ka bynta ki jingdonkam ba man ka sngi, hynrei ialeh katba lah ban shong hapoh iing khamtam haki por mynsngi, namar ka jing shah haka sngi ym tang ba ka pynsniewdur iaka sniehdoh, hynrei kan pynioh shibun ki jing pang kiba lah ban ktah ia baroh ka met jongphi.
4. 4. Kiar na ki jingdih pynbuaid – Ki jingdih pynbuaid kum ka kyiad, cigarette, duma bad kiwei kiwei ki dei ki daw bah kiba pyn tyrkhong bad kjit lut iaka um kaba don haka met jongphi kiba ktah shibun iaka koit ka khiah bad ia ka met baroh kawei. Namarkata kiar na ki jingdih pynbuaid ban iada iaka sniehdoh bad ki jing tyrkhong jongka met jongphi. Kumba ngi juh tip naki jingdih pynbuaid ym tang naki pyn tyrkhong iaka met hynrei ka thew pyrshah ruh sha ka jing pang bampong (cancer).
5. 5. Kiar na ki jing bam babun khlein (oily foods) – Ban bam ia ki jing bam ba bun khlein ka pynsuki ban tylliat iaki jing bam kiba ngi bam bad ka pyniohpang ruh iangi. Kynmaw haba phi ioh pang ka pyn tyrkhong noh ia ka met jongphi kaba wanrah ruh ia ka jing tyrkhong ka sniehdoh. Dei na kata ka daw ngi dei ban kiar shi syndon ban bam ia kine ki jait jing bam ban ioh iaka sniehdoh bad iaka met kaba koit ba khiah.