Ka rukom kanbas elekshon kaba kham pher, sdien u heh Liberal Democrat ialade ha u tyllai

Ha ka por elekshon, ki don shibun ki seng sain pyrthei, kiba don ia ki buit ba kham pher ban khring ia ki nongthep vote bad kumta U Sir Ed Davey, uba dei u nongialam jong ka seng Liberal Democrat ha United Kingdom, u don ia ka buit kaba kham pher bad kata ka long, ba u shu kynthih bad sdien ialade ha suin, da kaba u khot ka jingkynthih, da ka jingngeit lane “leap of faith”.

Namar ba ka elekshon, kan long noh ha ka sngi palei ha United Kingdom, kumta U Davey, u iaid da ka rukom kanbas ba thymmai bad kata ka long, da kaba u kynthih ialade na suin bad ka khubor jong katei ka jingkynthih, ka long “Leh ia kano kano, kaba phim pat ju leh baroh shi katta bad vote ia ka Liberal Democrat” bad u sdien ialade, ha u tyllai, ba la pyndait ha kawei ka crane ha ka madan phutbol ha Eastbourne, East Sussex.

Hadien, ba ula hiar khyndew, na katei ka jingsdien ialade ha suin, u Sir Ed, u ong “Ban pynkylla ia ka ri ha kane ka taiew, na ka jingsynshar jong ka seng Conservatives, nga wer ia ki paidbah, ba kin shim noh ia ka sien jong ka jingkynthih da ka jingngeit sha ka kynhun jong ka Liberal Democrats.