Ka RTE kam pynbha ia ka pule ha jylla, iakop tyrko ka YHAI

Shillong, 26 Nailar:
Ka Right to Education (RTE) kan ym wan rah ia ka jingpule kaba biang ia ka jylla Meghalaya bad ia kane la pynsngew da ki nongiatainia ha ka jingiakop iatyrko kaba la pynlong da ka Youth Hostel Association of India (YHAI) Meghalaya chapter, kaba la long mynta ka sngi.
Ki liangpyrshah kiba pyrshah ia ka motion kaba ong, ‘ka RTE kan pynbha ia ka pule puthi ha kane ka jylla’, ki la ai daw ba ka jingpyntreikam ia ka RTE kan pynsynjor ia ka pule puthi ha kaba u khynnah u skul un shu pas beit khlem ialeh eksamin, namar haba pas ia ka eksamin khlem ialeh eksamin, kan wanrah ia ka jingjot ia ka lawei ia ki khynnah.
Katba kiba kyrshan ki la pyni nia ba ka RTE kan pynlait noh ia ka jingpep skul shiteng por jong ki khynnah bad kan plie lad ruh ia kito ki longing kiba duk kiba shem jingeh ban ioh leit skul.
Ha kane ka jingiatainia ne iakop tyrko kaba la wan iashim bynta hynriew tylli ka St Edmund School ka long ka lahduh ba la wan mihkhmat ar ngut na kawei kawei ka skul.
Kaba wan baar ka dei ka BK Bajoria skul bad kaba lai ka dei ka H Elias Skul.
Ki skul kiba wan ban iashim bynta ki long ka St Anthony skul, Sacred Heart Boys Mawlai, Laban Bengali Boys skul.
U nongkren bat bit eh u dei u Arijit Pattanayak na St Edmund skul, uba ar u dei u Augustine Ams na H Elias bad uba lai, Diksha Agarwal na BK Bajoria.
Ia kane ka jingiakop iatyrko la pynlong da ka YHAI ban rakhe ia ka sngi ki nongseng ia ka YHAI ne ka Founders’ Day.
Ia kane ka jingiakop iatyrko la pynkhraw da ka jingdon u Deputy Commissioner ka East Khasi Hills u Sanjay Goyal uba la sam ia ki khusnam sha kiba jop ha kane ka jingiatyrko.
Shwa ia kane, u DC u la ong wat ha ka jingiatainia kiba kyrshan ia ka RTE ki shah rem hynrei ym dei ban kynran dien ban pyntreikam ia ka RTE.
U la ong ba ka RTE ka dei ka kamram ba la bynshet da ka riti synshar ka ri bad ka donkam ban pyntreikam ban pynurlong ia ka khlem jingartatien. U la ong ba watla bun ki jingeh ban iakynduh hynrei yn sa lah ban weng noh ia ki lyngba ka jingiadon bynta lang jong baroh naduh ki kmie ki kpa, ki bor shnong bad kiwei.