Ka ropeway, kaba khlem mashin, la tei hajan Sohrarim

Shillong:U bah Titos W Chyne Chief Executive Member jong ka KHADC mynta ka sngi u la plie ia ka “Gravity Ropeway” kaba nyngkong ha ka shnong Nongtraw, ha jan Sohrarim kaba la shna da ka NESFAST.

Haba kren ha kane ka jingialang plie, ia kane ka Ropeway kaba khlem pyndon kam, da kano kano ka mashin, u bah Titosstarwell u la ong ba u la sngewlyngngoh haba la khot ia u ban plie ia kane ka Ropeway ban ong ba la shna ha kata ka rukom ba khlem da pyndon kam ia ki mashin kumba long lem kiwei ki Ropeway.

U CEM ka KHADC u la ong ba kane ka Ropeway ka long kaba phylla shisha bad ka burom ka leit sha u bah Pious Rani, ba la trei shitom ban ioh ia kum kane ka Ropeway, ka ban iarap shibun ki paidbah bad u la ai ka jingkular ba kum kane ka Ropeway, yn sdang shna noh sha ki ar tylli ki shnong na ka skhim MDC.
Ha kane ka juh ka jaka, la ong ba namar ka la don kane ka Ropeway don kam ia ka jaka set ia ki mar rep bad u la kyrpad ia ki trai jaka ba kin ai jingbit ban shna ia ka kudam ia kaba kitrai jaka kila kular ban ai na ka bynta ban shna kudam.

Haba ia dei bad ka jingpan ia ka surok sha kitei ki shnong, kiba don ha katei ka jaka, u bah Titosstarwell u la ong ba ka sorkar pdeng ka don ia ka skhim PMGSY ia kaba yn sa peit ia kane, hynrei ban pynsuk ia ka kit ka bah, kane ka Ropeway kan long ka jingmyntoi ia ki paidbah.
U Bah Pious Rani Executive Director ka NESFAST, u la ong ba ia kane ka buit shna ia kane ka Ropeway la ioh nongmuna na Himachal Pradesh bad ia kane mynta ruh la wan ban pynshna da ki briew na katei ka jaka ha kaba ki la hikai ia ki trai jylla bad nangne sha khmat kin shna ki trai jylla ia ki Ropeway Gravity kiba kin dang shna naneng sha khmat.

Ia kane ka jingialang la pyniaid da u rangbah shnong u bah Carmelus Rani. Kiwei kiba la kren ha kane ka jingialang ki long ka kong Suklin Dohling, bah Lambor Diengdoh trai jaka, ha kane ka sngi la don shibun ki trai shnong ban sakhi lang ia ka jingplie ia kane ka Gravity Ropeway.