Ka rong Blu

Bah D. Pakyntein

Ha ka sngi bam smai, u Rangbah Dr.Ricky Syngkon, u deng da u tie rong blu. Kane ka rong, ka thaba haduh katta-katta, bad ka pynphuh-pynphieng, ia ka dur khmat kaba shai bad kaba don ka jing khyrmen. Baroh ki MP, kiba don ha kato ka sngi, ki da kwah ban peit bha markhmat, ia uta u MP bad ka Seng, kaba jop lut ia ki bor baroh. Hooid; ka jylla Meghalaya, ka hiar sha trai bha ha baroh ki liang, hynrei ka long nyngkong pat ha ki jing ialap elekshon, shu lut tang ka bai umphniang kali, bad bai wai ia ki tyndong pynsawa, rynsan ruh ym ju iohi, bym don pisa ban pynlut kai, lada slap, ia-jhieh lang bad u paidbah ba shit-rhem. U Rangbah Saleng Sangma, ruh u iphuh-iphieng kumjuh, u sngew shngain ruh, ba dei na kajuh ka jylla.

Bun bah ki lama ba don ka rong blu. Ka lama jong ka United Nations ka dei ka rong blu, ka dak jong ka jingiatylli bad ka jingiasuk: ka SBI ka pyndonkam da kane ka rong, ka pyni kumno ban khynshew, bad pynlut ban iohnong: bun ki kali kit nongpang, ki thoh da ki dak bad pynthaba da ki lait rong blu, ka dak jong ka jingai jingsumar kaba kham kyrkieh: ka rong blu, ka dei ruh ka dak ban iada ia ka mariang: bun ki Iingmane, ki jaka ia jingsumar, bad ki skul, la ai da ka rong blu: ka sad jong ka pyrthei, U Nongbuh-Nongthaw U ai da ka rong blu; hooid, ki stad saian ki lah ban batai da kumwei, kata ka dei ka kam ka jong ki. Shaei ka Synduk Ka Jutang, ka don, kaba U Blei, U lah mana ban peit bad ban ktah?

Ka lama ba don rong blu jong ka VPP, ka rong ba ai mynsiem, ka rong ka jingiasuk, ka rong ka jingtngen, ka rong jong ka jingiatip lem, ka rong ka jingkyrmen, ka rong jong ka jingstad-jingshemphang, ka rong ka bym shet kylla, bad kumta ter ter. Ha ka 8 tarik u bnai Jylliew, 2024, lah iohi ia ka rynsan rong blu, jong ka VPP, wat la ka rit ruh, ka pyndum ia baroh ki rynsan ba phyrnai, ha ki por ialap elekshon.
Ki paidbah ba rah lama rong blu, ki tap lut ia ka khyndew rong bthuh, bad ki phlang rong jyrngam ka madan Smit.

Ha ka Kitab Eksodos 24:10 – bad ki lah iohi ia U Blei ki Israel: te la don hapoh ki slajat jong u kumba la siang da u maw sapphir, bad kum ka met jong ki bneng ha ka jingphyrnai. U mawkordor sapphir u don ruh, ha kiwei ki rong, hynrei u rong blu u kam paw ha ki por hyndai, bad haduh mynta ruh. Kane ka kyrteng ka rong, ka paw bha ha ka Holy Bible, bad ka kyntien peh ruh lah thoh bunsien ha ka Baibl, Loukas 3:17- uba ka jingpeh jong u ha ka kti jong u; hynrei ia u stait un thang da ka ding bymjulip.

Ki jingtynjuh, ban pyn khyllem, kim dei shuh kiba dang thymmai: U Jisu Khrist, ruh u lah mad bunsien ia ki jingtynjuh, hynrei U jop beit ia ki. Ka don kawei jingtynjuh, kaba kham pher, ia kaba ngi lah ban shem ha ka Gospel U Ioannis ka lynnong kaba 8. Hangne ngin shem ba ki nongthoh bad ki Pharisi, kiba ieh bad klet lut ia ki kam ki jam kiba ki dei ban trei, step la bad miet, ki pyndonkam ia ka khlieh ba khlem jabieng, kumno ban pynkhyllem, ia U Nonghikai. Oh, ki lah wallam ia ka briew kaba klim: ki da ia ong ruh ba kat kum ka hukum U Moses, lah dei ban lymthem maw, bad ki lah kylli ia U Jisu, me te me ong kumno? Ka lah dei ka jingkylli kaba eh bha ia u briew ban jubab. Hynrei U Jisu u lah dem ha tbian, ban pyndem hakhmat U Blei, ban ioh ia ka jubab kaba dei eh, bad ruh u lah thoh da ka shympriahkti ha ka khyndew, ym don ba tip u thoh aiu. Haba u la pynieng ialade, bad u ong ba uta uba khlem pop, to un lynthem nyngkong, bad baroh ki phet iam rem haba ki iohsngew ia ka jubah kaba tang shi lain; bad U Jisu u khlem pynrem ka ka.

Ha ka Kitab Deuteronomi 22:25-29 la thoh shaphang ka jingbatbor ia ki kynthei. Ka long kaba sngew shyrkhei ban tip ba ka jing shah thombor ki kynthei-khynnah ka kiew katne-katne ha ka jylla jong ngi. Ko, phi ki kynthei-kynnah ba tang shi bor, 12 bor phin ioh na kane ka rong, bad ah, ki nongthombor, kynshew noh kloi, sanphew ki shekel rupa: Husiar bad to tip ruh! “Ka ding rong blu ka khlain ka khluit da ki spah shah ban ia ka ding rong saw”.