“Ka Ri Bilat, ka ithuh ia u Tirot Sing kum u khlawait”

Shillong, 19 Naitung:
Ka Western Youth Welfare Organisation (WYWO) na West Khasi Hills ka la leit ban buh syntiew ha u Mot Tirot Sing ha Mairang bad Nongkhlaw ha ka 17 tarik Naitung, ban kynmaw burom ia ka lyngkhuh sngi iap ba 180 snem jong u Syiem Tirot Sing, uba la iakhun pyrshah ia ki shipai phareng.
Ia kane ka jingleit buh syntiew la ialam da President Bah AM Shadap bad u Genl Secretary bah C Sherkon ryngkat ki dkhot ka Nongstoin Circle.
Ki dkhot ka seng ki jurip ruh ia ka Ksaid Phan Nonglait, ia kaba ka seng ka la angnud la slem ban pynlong kum ka jaka shangkai pyngngad bad ha kajuh ka por ban ai nam ia ka longkmie Phan Nonglait, ba lyngba ka jingstad jong ka ki la ioh ba pyniap haduh 60 ngut ki shipai phareng.
Haba kren bad u President, AM Shadap ula ong ba ka seng ka wah ruh ia ka signboard (Jingthoh) ha katei ka jaka ba la thoh “Phan Nonglait Fall” bad ka kwah ba ban pynlong ha katei ka jaka kum ka jaka shangkai pyngnad ban khring ia ki nongleit nongwan naba ka don ha surok Mairang- Rani Godown  road.
Katei ka kshaid ka don hapdeng ka Nongkhlaw bad Mairang hajan ka shnong Nongrymmai.
Ki la leit ban jngoh ruh ia ka krem Tirot ban iohi bad tip shaphang ia ka jinglong jingma katei ka krem u Tirot Sing Syiem kaba don ha ka jrong lum ha ka shnong Mairangbah.
Ka WYWO ka la ong ba ka ri Bilat ruh ka ithuh ia u Trot Sing Syiem kum khla wait ka ri Khasi bad Jaintia. Ha katei ka  sngi la pynlong ia ka jinglang paidbah bad buh syntiew ban kynmaw ieit  ia utei  u khla wait ka ri  ha Mairang bad Nongklaw ha kaba u MLA-MDC ka Mairang konstiwensi u bah Metbah Lyngdoh ula long u Kongsan ha ka jingialang ha  Nongkhlaw bad ka Kong Matsiewdor War Nongbri  kum ka symbud kongsan kynthup ki synjuk Sordar, ki riew rangbah kiba la ai jingkren halor ka jinglong shynrang mynsiem u Syiem Tirot Sing ba  iakhun pyrshah  ia ki shipai phareng bad kum u rangbah ula pha la ka jingim ban bad len lade ha ka jingiap ban lait na ka jing long mraw  ki paidbah ha ka jingsynhar ki ki sahep phareng ha kito ki por.
Ha kane ka sngi la pynphuh pynphieng ia ka prokram da ki jingrwai, shad bad ki jingialehkai kynjat bol phainal hapdeng ka klob Mairang bad Nongthyllep.