Ka Reservation Policy, kam don jingmut khlem ka roster, ong u Conrad

Ki MLA, kiba shim bynta ha ka jingialang jong ka liang synshar Meghalaya Democratic Alliance (MDA), ha ka sngi palei.

Shillong:U Myntri Rangbah ka jylla u Conrad K Sangma u la ong ba ka Reservation Policy kam don jingmut khlem ka Roster system bad mynta ka kynti, ka sorkar kan iakren beit tang ia ka Roster, ym ia ka Reservation Policy.

U Conrad ula ong ba ka jingialang ka kynhun sorkar Meghalaya Democratic Alliance -2, ka la sngew hun ha kiba bun bynta watla ki don katto katne ki bynta ba ki seng sain pyrthei ki dang pan por ban pule bniah kham bha.

“Ka Reservation Policy khlem ka Roster system kam don jingmut,” la ong u Conrad hadien ba la wai ka jingialang ka MDA mynhynnin ka janmiet.
U Conrad ula batai ruh ia ka rukom treikam ka Roster ha kaba iadei bad ka jingpyntreikam ban thungkam bad ula ong, ba ka sorkar ka bud ia ka jingbthah ka kashari halor kane.

Lah ban kdew ba ka sorkar ka la khot ia ka jingialang jong baroh ki seng sain pyrthei ban iakren ia kane ka bhah bate kam ne ka Roster.