Ka rep ka riang, ha ka juk mynta

Da U Bah Philip Marwein

Kumba ngi la tip 80 na ka 100 jong ki nongshonshnong jong ka jylla ki dei ki nongrep bad ka ioh ka kot jong ka jylla ka shong ha kine ki nongrep.

Lada ki nongrep ki khlain ha ka ioh ka kot ka jylla ruh ka khlain ha ka ioh ka kot hynrei, lada ka ioh ka kot jong ki ka tlot ka ioh ka kot jong ka jylla ruh ka tlot. Ban shu shim kyllum ia ki nongrep baroh bun na ki, ki dang tlot bha ha ka kamai kajih tangba kim lah ban ieh ia ka rep namar kam don da kawei pat ka lad kamai. Bun na ki katba nang rep shu iasyrdep katba ioh ei. Ka daw jong kane ka dei ba kim don ka khyndew lajong bad kim don ka seng ka dang kaba biang ban pynheh ia ka rep kaba ki trei. Ia ka jaka rep ki shu rep wai bad ka baiwai ruh ka rem haduh katta katta, ka shitom ia ki ban pynmih. Nalorkata ruh ia ki mar-rep jong ki la thied tad dor ha iew ha hat lane la khniot dor palat da ki nongkhaii pateng. Ym dei tang katta ki nongrep ki shitom peisa ban thied symbai, sboh bad ki shem jynjar ban ai bylla namarba kim don ka seng ka dang kaba biang. Kumta shu tyllun shi tyllun hajuh shi hajuh. Na ka bynta kito ki nongrep kiba don khyndew lajong ban rep te ki la lait na ka baiwai, hynrei ka shong pat ha ka seng ka dang ba ki don, namarba ka kam rep ka ktah bun jait bun rukom. Kaba ki nongrep ki donkam palat ha ka juk mynta bad wat ha ka juk mynshuwa ruh ka long kine harum:

1. Ki donkam ban don ka jingkoit jingkhiah namar khlem ka jingkoit jingkhiah kim lah ban trei ban ktah bad ban rep, namar ka rep ka don donkam palat ia ka bor met.
2. Ki donkam ban don bun ngut ban rep, namar lada rep tang marwei ym lah ban rep shibun bad ka jingphoida ruh ka mih tang khyndiat eh.
3. Ki donkam ia ki buit rep kiba thymmai. Namar lada pyndonkam da kijuh shi kijuh ki buit rim ka jingmih phoida ruh ka duna bha bad na ka bynta kane ki donkam ban ioh buit bad na kiwei kiwei ki para nongrep bad ki donkam ia ka training ha ki buit thymmai.
4. Ki donkam ban don ka khyndew lajong ban rep. Sngewsih ban ong ba bun na ki nongrep kim don khyndew lajong hynrei ki shu rep wai ia ka khyndew jong kiwei. Kam don ka jingsngew trai bad ki shongsyier ioh ki trai khyndew kin beh noh ia ki na ka jaka rep haba ym lah ban siew baiwai. Namar kam dei ka khyndew lajong kam don ka jingsngew trai bad kam don ka jingsumar bha ia ka khyndew. Ka khyndew ka kham seisoh lada ka don ka jingsumar bha ia ka.
5. Ki nongrep ki donkam ia ka seng ka dang ban rep namar hab ban pynlut shibun kiei kiei, khamtam ban thied symbai bad sboh kiba long kiba remdor bha, nangta hab ban ai bylla, kane ruh ka long kaba remdor bha ha ka juk mynta. Nangta hab ban thied ia ki dawai pyniap khniang kiba bam ia ki jingthung bad kane ruh ka long kaba remdor shibun.Ynda la dei ka por pyniaid iew ia ki mar-rep pat ka dor ka tad ka long kumba shu leit die tad die ur khlem mih shuh ia ka bai pynlut baroh.
6. Ki nongrep ki donkam ia ka iew kaba jan bad kaba suk ban pynpoi ia ki mar-rep bad ki donkam ia ka iew kaba bitdor ban lah ban kham pyniaid iew ban dup mih phoida bad ban iohnong nalor baroh ki jingpynlut. Ki donkam ruh ia ki iew ban ioh shalan shabar ban kham lah dor.
7. Ki nongrep ki donkam ruh ia ki kudam khriat ban buh ia ki mar-rep lada kim lah ban pyniaid ha ka por kaba dei bad ha kajuh ka por ki long artat ki lad pynap ia ka dor lada ka dor iew ka tad palat.
8. Ki nongrep ki donkam ruh ka jingiarap bad jingkyrshan lem na ka liang ka sorkar ha ki bun ki bynta khnang ba da ka jingiatreilang ka sorkar bad ki Nongrep shibun ki jingmyntoi kin wan, khamtam halor ki buit rep thymmai, ki kor ki bor, ka rukom pyniaid iew ia ki mar-rep, ki dawai bad sboh bad bun kiwei kiwei ki bynta.
9. Ka juk rep mynta ka donkam ka jingiatreilang bad ka jingiasam lang ia ki buit ki sap ym tang para nongrep hynrei bad kki bor sorkar lem bad ki nongdie nongthied bad nongshalan.
   Ka donkam ka jingiateh lok ba ka iew kan iaid bha bad ha ka dor ka mur ruh.Na ka liang ka sorkar kan long ka nongai ka kti kamon kti kadiang ban iarap lem ia ki nongrep khamtam lei lei ha kane ka juk mynta la mih bun jait bun rukom ki rukom rep. Ym dei shuh tang ka rep ia ki jingthung jingtep hynrei ki la bun ki jait jing rep, kum ka rep tit, rep syntiew, ri jingri babun jait.
   Ka long kaba donkam eh ba ha kane ka juk mynta ki nongrep kin iit barabor ia ki lad bad ki buit thymmai ym ban shu hun tang ban shu leh ia kajuh shi kajuh.