Shillong:U Conrad K Sangma, myntri rangbah ka Jylla, u iathuh ba ka jingmad jong ka jylla ia ka jingshah pynlip light kam dei na ki Generation Company, hynrei ka dei na ka Transmition Company kaba dei ka PGCIL.
“Na ka liang jong ka sorkar jylla ka la khot ia ka jingialang bad ki nongpyniaid jong ka PGCIL ha ka ba la shim ia ka rai ba hadien ka 24 kynta, yn weng noh ia ka jingpynlip light kaba 7 kynta ha ka jylla baroh kawei” u la ong. Ula iathuh ruh ba ka sorkar, kan hap siew ia ka ram ba sah da ki snem ia ki generation Company mynta ba la shim da ka MeECL lyngba ka REC kaba long 1345 klur bad kane ka long na ka bynta ka Athma Nirbhar Program jong ka sorkar kmie.
“Ka sorkar kmie bad ka REC ka la shim ia ka rai ban pyllait ia ka pisa, ha ki 2 bynta kata kan long 672 klur ha ka bynta ba nyngkong bad 672 klur ha ka bynta ba ar, ha kaba ka REC ka la pdiang ban pyllait 672 klur bad na kane 336.43 klur ladep ban pyllait sha ki company bapher bapher bad na ka 1345 klur ladep ban siew 336 klur bad kumba 75 % ka dang sah” u la ong.
La iathuh ruh ba na ka T.336. 43 klur, ka REC ka la pyllait hi ia kane ka pisa sha ki company bapher bapher kaba kynthup ia ka T.127 klur sha ka NEPCO, T.40 klur sha ka NHPC,T.144 klur sha ka NTPC bad T.25 klur sha ka PGCIL katba ka pisa ka ba dang sah kan siew hi ka REC. U la iathuh ruh ba dangshen kat kum ki kyndon ba la buh ha ka power sector ba la leh da ka PGCIL, ia ka pisa ka ba iadei bad ka Athma Nirbha program, kaba long T.1345 klur, ha kaba ka REC kam shym pat pyllait ia ka pisa.
La iathuh ba na ka liang jong ka PGCIL, khlem da ap ia ka jingpyllait pisa jong ka REC ka la pyntrei kam ia ka kyndon ba ka don, ha ka ba ka jylla ka la mad ia ka jingshah pynlip ding haduh 7 kynta.
U myntri rangbah u la ong ruh ba ka MeECL ka la mad shibun ki jingeh ha ki snem ba la dep bad bun ki sien jam ba na ka liang jong ka sorkar ka la shim ban pynkhlain ia kane ka tnad treikam bad la kyntu ia ki nongshim light ba ki dei ban thikna ka siew bill light khnang ba kane ka tnad trei kan khlain.
U la ong ruh ban weng ia ka jingeh halor ka jingkiew ka bill light, ka sorkar jylla, shen kan sa pyntrei kam noh da u smart meter ban wanrah ia ka jingkhuid jingsuba halor ka bill light.
Na ka liang upaidbah nongshong shnong ka jylla Meghalaya, ngi dap da ka jingsngewphylla ba na ka por sha ka por la ju iohi ba ka tnat ba dei ia ka Electricity ha ka jylla ka ju pynlip ding, bad khamtam eh kaba ai daw ia ka jingkitram jong katei ka tnat, bad mynta ruh la iohi ba u CM, Conrad K. Sangma u la pynbna ba ka don ka ram kaba T1,345 klur kaba ka jylla ka hap ban siew. Ka jingkylli ka long, Kumno katei ka tnat ka kitram? Hangno ka Kitram? Don ne em ki bym siew bai ding Electricity? lehse ki don; Ha kano ka Shnong, ne ha kano ka District ki don ki bym siew bai Electricity?
U paidbah u dei ban tip, namar, kumba ngi iohi ba baroh ki pyndonkam Electricity ki siew ia ka bai light kaba biang bad kaba rem ruh, hynrei wat la katta ruh ioh don ki Shnong, ki District ha ka jylla ki bym siew tikna ia ka bai light, ngi dei ban tip namar ba ka pynlong langknia ia ki nongshong shnong ha ka jylla baroh kawei tang na ka daw jongno re jong no.
Kum u paidbah nongshong Shnong jong ka jylla, ngi kwah ba ka sorkar kan pyni da kaba shai ia ki daw jong ka jingsahram ne jingkitram ka tnat Electricity, namar lehse ka pynlong ia ka jylla man ka por ba kan kitram bad duhnong haduh katne, katne… ngi ngeit ba ka don hi ka daw, namarkata, ngi kum u paid nongshong shnong ka jylla ngi kwah ban tip , bad lada donkam wat ban phah da ki enquiry ruh namar ioh don eiei sha lyndet.