Ka Raid Myrwet “ka Raid Marwari” ong u MDC ka Jirang

Shillong,30 Risaw:
U Bah A.Rani, MDC ka Jirang u la ong ba ka konstitwensi jong u ka Raid Myrwet mynta ka kylla long kum ka Raid Marwari, kaba dei ka jaka kaba la jyllei eh ki bar jylla. U MDC ka Jirang haba kren halor ka khyndew ka shyiap u la ong ruh ba ka sengbhalang ka CSWO ka la ujor bad dawa na ka District Council ban weng noh ia u Syiem ka Raid Myrwet uba la die noh shi lyngkhot ka jaka sha u briew uba la tip kyrteng kum u Ratna Thapa Gogoi u briew uba da ka juh ka kyrteng la mih ar tylli ki jait. U Bah Rani u la pynsngew ha ka Ing Dorbar ia ka jingdie duh u Syiem Myrwet ia ka khyndew ka shyiap sha u bar jylla ha kaba u la dawa ruh ba dei ban weng Syiem noh shisyndon ia u. “Dei ban weng noh ia u na ka jinglong Syiem” ong u MDC ka Jirang ha ka Ing dorbar.
Haba jubab na ka liang ka Ec halor ka jingkren u MDC ka Jirang, u Bah L Blah EM u la kubur ba ki bar jylla, ki bun bha ha ka Raid Myrwet bad u la kubur ruh ba la ioh ki jingujor na ka CSWO hynrei u la ong ba ia mynta u la pan ia ki kot ki sla ha kaba ia dei bad Raid Myrwet bad shen yn sa leh ia kaba donkam ban pynbeit ia ki kam hangthie ( Raid Myrwet).