Ka rai ka Supreme Court, dei ka kjat sngi, ha ka jingduh jingkyrmen, ong U Saleng

Shillong:U MLA ka Congress u Saleng A Sangma, u la ong ba ka jingrai jong ka Supreme Court ban pynneh ia ka jingong MP jong u Rahul Gandhi ka wanrah ia ka kjat sngi hapdeng ka jingduh jingkyrmen bad kane kan sakhi ba ka kynhun INDIA kan ieng pyr shah ia ka politik pynhiar kput.

Mynta ka sngi, ka Supreme Court ka la pynsangeh ia ka rai jong ka Gujarat Sessions Court ban pynduh ia ka jinglong MP u Rahul hadien ba ula shah ujor pyrshah ia ka jingkren pynbudnam ia ka kyrteng Modi ia baroh ki nongtuh ha ka ri.
“Hadien kane ka hukum ka Supreme Court, ka politik kput kam lah ieng bad ka synshar paidbah ka la im biang mynta. Ka BJP kam lah ban shu khniot iano iano, bad ki paidbah ki don ka jingkyrmen mynta”, la ong u Saleng.

U la ong ba ka INDIA- Indian National Democratic Inclusive Alliance- kaba dei ka kynhun pyrshah ia ka NDA ba ialam ka BJP, kan ieng ban thom ia ki jingeh ha ka ri.
Da kane ka rai, u Rahul u lah ban leit biang sha Parliament kum u MP ban iashim bynta ha ka dorbar.
“Baroh ki kmen ia kane ym tang ka Congress. Ngi sngew kmen bad ngi rakhe kmen ia kane ka jingjop jong u Rahul”, la ong u Saleng.

Haba pynpaw ba ka jingshisha ka ieng, u Saleng u la ong ba u Lamphang uba la pynduh ia ka jinglong MP un hap ban weng noh ia ka hukum jong u.