Ka rai ka High Command, ngam don eiei ban ong:Shibun

Shillong, 6 ‘lyngkot:
“Ka rai ka High Command, ngam don eiei ban ong” ong U Ma Shibun Lyngdoh, President ba thymmai jong ka seng BJP ha Meghalaya. Haba la kylli biang, utei u rangbah, ula ong shuh shuh “Ka lah ibit ianga” bad ula ong “Ngan sa ia kynduh iaphi, ynda haba la shimti kam”. Haba la kylli pat, lano un shimti kam, la jubab U Ma Shibun “Kim pat ong eiei”. Halor ka jingkyn thoh, ba U Ma Shibun, ula pynbam pisa ia ki heh jong ka seng BJP, ka jubab, kaba u ai, ka long “Ha ka por ba ai tiket ruh, ki ong ba ai pisa ia ki nongialam BJP ha Meghalaya bad mynta ki ong ba pynbam pisa ia ki nongialam BJP sha Delhi”. Halor katei U Ma Shibun, ula kyntait ba ka don katei ka jingpynbam pisa jongu.
U bah David Kharsati, uwei na ki nongialam ba rangbah jong ka seng BJP, haba iakren bad U Rupang, ula ong “Kaba biang bha, kaba leh ki nongialam jong ka seng, namar ba ka kynhun trei kam kaba rim ka tlot bha. Kat ka seng, kaba synshar ha Delhi, ki kotkhubor, kim da ioh thoh bha”. Ula ong biang “Kim ju shim ia ki ishu” bad u ong shuh shuh “Kat ka seng heh jong ka India, kaba synshar ha Delhi, ka dei ban shim ia ki mat treikam, kiba iadei bad ki jing trei kam ba beain jong ka sorkar Jylla”. Ula ong biang “Ka jaitbynriew, ka mad ia ka jingeh kaba khraw ha u snem ba ladep”. Hynrei ha kane ka kynhun kaba rim, ka dei kaba ioh thiah pynban, ula ong shuh shuh. La ong, da utei u rangbah, ba ka seng BJP, ka dei ban long ka seng, kaba kren ia u paidbah, lane kaba long people centric party. U bah David, ula ong ba um kyrshan satia ia U Ma Shibun, ia u briew shimet, haba u long u nongialam ba thymmai, hynrei, un sa kyrshan, un da iohi ia ki kam, kiba un trei nangne shakhmat.