Ka rai jong ka iing bishar mynta ka sngi ka long ka jinglehrain ia ka sorkar jylla: PN Syiem

Shillong: U Lamphang jong ka KHADC u Bah Pynshngian N Syiem u la ong ba ka rai jong ka iing bishar mynta ka sngi ka long ka jinglehrain ia ka sorkar jylla namar ka DCA kam sngewthuh ia kyndon jong ka rukom treikam jong ka District Council bad kynnoh ruh ba ka jingthut ha ka rukom trei kam ha KHADC la arbnai mynta ka dei na ka daw jong ka Sorkar Jylla.

Ha ba ia kren bad ki lad pathai khubor, na ka liang u bah PN Syiem hadien ba la ioh ia ka rai na ka ingbishar jong ka jylla mynta ka sngi ha kaba ka la pynksan ia u CEM jong ka KHADC halor ka mukotduma ka ba ia dei bad ka jingthung ia ki Executive Member u la ong ba ka jingkynnoh baroh ka leit sha ka sorkar jylla ia ka jingthud ka trei kam hapoh jong ka KHADC ha kine ki ar bnai.

U Bah PN Syiem u la ong ba u pdiang sngewbha ia kane ka rai jong ka iing bishar mynta ka sngi bad lyngba kane ka rai jong ka iing bishar ba mih mynta ka sngi sorkar ka ban wan ha dien ruh kin ym ialehkai shuh bad ki District Council.

U Lamphang jong ka KHADC u la ong ba ka jingkwah jong ka sorkar ban pynjari ia ka Administrator Rule ka long ka bym don nongrim, namar ba ym juh don Administrator Rule hapoh jong ka District cuoncil, hynrei ka don tang ka Governor Rule.U la ong ruh ba ka rai jong ka iing bishar mynta ka sngi, ka kdew shai ba ia ki myntri kabinet ha sorkar pdeng dei u myntri rangbah duh jong ka Ri ban phah sha u President, ha jylla u myntri rangbah un phah ia ki kyrteng jong ki myntri sha u Lat ka jylla bad ha District Council dei u CEM ban phah ia ki kyrteng sha u Lat ka jylla.