Ka rai halor ka ILP, ka shong ha ka sorkar pdeng, ong U Rijiju

Shillong:U myntri ka sorkar pdeng u ba dei peit ia ka tnad ialeh kai, u kiren Rijiju, ha ka sngi nyngkong u la kyntait ban iakren ne kynthoh halor ka jingdawa ia ka Inner line permit ha ka jylla Meghalaya.

Haba ia kren bad ki lad pathai khubor, u Rijiju u la ong ba ka mat Inner Line Permit ka dei ka mat jong ka sorkar bad ka shong ha ka rai jong ka sorkar pdeng.

U la ong ruh ba ka sorkar NDA hapoh ka jingialam jong u Myntri rangbah duh ka Ri u Narendra Modi,u shimkhia bad pyrkhat kyrpang ia ki jingdonkam ban pynneh pynsah ia ki riti dustur jong ki ritpaid na ki dong shatei lammihngi.

U la ong ba ka jingiakhih bad ki jingbuh ia ki jingdawa ka dei ka bynta jong ka synshar paidbah, hynrei ka ba donkam ka dei ban pynneh pynsah ia ka shongsuk shong sain ha ka Ri baroh kawei.

Ha kawei ka liang, kum shi bynta ban pynpaw ia ka jing pyrshah CAA bad ban dawa ia ka jingpyntreikam ia ka ILP ha ka jylla, mynta ka sngi ka KSU ka la rah ia ki placard ha khmat ka skul bah North Eastern Hills University, kaba dei ka jaka ba u leit plie U Rijiju ia ka jaka ialehkai.