“Ka pyrthei kam shun ia phi, hynrei ia nga”

AIS Suja

“Ka pyrthei kam lah ban shun ia phi, hynrei ka shun ia nga” kine ki long ki kyntien ba u Jisu u la kren ha ka por ba ki Jiw ki la wad ban pyniap noh ia u. Mathaios 7:7. Ka mut ba wat ki Jiw ne ki para jong u kim ngeit ha u. Kim ngeit ba u Jisu u dei uta u Messiah ba la phah da u Blei. Kane ka jia haduh mynta ruh ha Israel.

Ki Jiw kim pat tip kim pat pdiang ba u Jisu u dei uta u Messiah uba ki ia ap khmih lynti, bad kim pdiang ruh ba dei uta u khun jong u Blei. Balei ka pyrthei (ki briew ka pyrthei) ki shun ia u Jisu? U Jisu u ong – “Namar ba nga phla shaphang jong ka ba ki jingleh jong ka ki long bymman. Mathaios 7:7. Ka jingleh bad jingngeit jong ki Jiw ki la long bymman. Haduh ba u Jisu u da pynshai da kaba ong – “Nga la wan hiar na bneng ym ba ngan ioh leh ia ka mon jong nga hi, hynrei ia ka mon jong uta uba la phah ia nga. Namar kane ka long ka mon u Kpa jong nga, ba u briew uba iohi ia u khun bad uba ngeit ha, un ioh jingim bymjukut, bad ba ngan pynmihpat ia u ha ka sngi kaba khadduh” Ioannis 6: 38-40.

Kane ka jingshun ia u Jisu u khun u Blei ka la long naduh kaba sdang hi, naduh ka por ba la kha briew ia u sha kane ka pyrthei, bad ia kata ngi iohi ha ka por ba synshar u Syiem Herod, da kaba ong – “To khie leit noh ia wad biang biang ia uta u khunlung; bad ynda phi la shem wan iathuh ha nga ba nga ruh ngan wan mane ia u” Mathaios 1:8. Hynrei ka jingshisha ka long ba u Herod u kwah ban pyniap ia u Jisu, namar u tieng ioh duh ka long Syiem ha ka hima Israel. Kane ka mynsiem jingshun ka wan na u soitan Lucifer bad ka rung ha u Syiem Herod bad ka rung ruh mynta sha ka pyrthei baroh kawei, namar u soitan u tip ba dei tang ka kyrteng Jisu kaba lah ban pynkylla ia u briew na ki jingbymman. Ka mynsiem ksuid mynsiem soitan ka la rung bad trei haduh kine ki sngi ha kylleng ka pyrthei kat haduh ba ka mih ki jingsngew iapher jait iapher niam ha kylleng pyrthei kynthup ia ka ri India.

Ki briew ki sngew ba ki jingleh jingngeit jong ki ki long kiba bha da kaba isih pat ia kiwei pat ki jait bynriew jait niam. Kane ka long ka jingtrei ki mynsiem bymman (devil spirits) ban ioh pynjot pynpra ia ka imlang sahlang ha ka longbriew manbriew, ban pynthut pynwit ia u briew ban poi sha kata ka jingtip ia kaba shisha.

U Jisu u la dep iathuhlypa ba kita kiba ngeit ha ka kyrteng jong U kin sa shah shitom – “Kin ai ia phi ha ka shitom, kin pyniap noh ia phi: phin long kiba la shun da ki kynja bynriew bartoh NA KA BYNTA KA KYRTENG JONG NGA” (And Ye shall be hated of all nations for my name sake). Mathaios 24:9. U JIsu u la dep kren lypa, ba dei na ka bynta ka kyrteng jong u ba ka pyrthei kan ia kulmar, kin pyniap ia kita kiba sakhi ia ka kyrteng Jisu, kin ia thang ia ki Temple ne iingmane Khristan ha kylleng sawdong ka pyrthei kumba la jia hapoh India mynshwa bad mynta. Kaei kane? U Jisu u la dep ong – Ka pyrthei ka shuin ia Nga, ka pyrthei kam shun ia u Khristan hynrei ka shun ia u khun U Blei, ka mut ba ki shun hi ia u Blei. Hato ki tip balei ki leh kumta? Em kim tip. Hynrei ba yn ioh pyndep ia ki jingiathuhlypa ka Bible ka ktien u Blei.

Namar ka ktien u Blei ka ai dak ha ngi ba ngin tip ba ynda ngin iohi ia kine kiei kiei, to tip ba kine baroh ki long tang ki jingsdang jong ki jingjynjar. Kaba khraw tam ka jingjynjar kan long ha ki 3 snem shiteng ka por ba u soitan un synshar da lade hangne ha pyrthei. Mathaios 24:8-9 / Daniel 9:27. Hynrei to tip ba ka pyrthei kam shun ai ki Khristan, hynrei ka shun ia u Jisu. Ioanis 7:7. To sngewthuh ia kane ka jingong. Amen.