Ka pyrthei kaba kylluid, ka mon kaba laitluid

Babu Kular Khongjirem

U Blei Nongbuh Nongthaw udei uba stad shisha uba la thaw ia kane ka pyrthei jongngi ba kan long kaba kylluid ha ka mon ba laitluid ban ia iaid ban ieng,ban ia trei ban ia ktah,ban ia kamai- kajih,ban nang ban pyndonkam ia baroh ki jingdon jingem(resources),ki jait jingthaw kiba don jingim bad ki bym don jingim ruh kumjuh kat kum ki jingdonkam bapher bapher bad kumta ter ter.Hynrei napdeng ki jingthaw jong u Blei,u briew u dei u jait jingthaw uba long trai bad kynrad(master) lut ia baroh lait na u Blei.

Baroh kat kiba don ha kane ka pyrthei u Blei u la thaw laitluid ban ia im ia sah, ban ia ioh la ka bam ka dih katkum ka jingbuh bynta U.Ki mrad ki mreng ki iaid laitluid ha khlaw katba mon ban wad hi ia la ka jong ka bam ka dih khnang ba kin im kin sah(survived) ha kane ka pyrthei..Ki sim lei ki shu ia her ha khlaw ha btap bad ki ioh hi ka bam ika dih ban bam kum ki puit ki khniang bad ki sohdieng bapher bapher baroh shi saw aiom.

Wat ki khniang ki ksiah ruh kim don jingkhuslai bad ki shah pyniap kampher haba ki wad ia ka bam ka dih jongki. Baroh ki laitluid katkum ka jingbuh beit buh ryntih u Nongbuh u Nongthaw ha kane ka sla pyrthei.

Haba phai pat sha u briew,ka jingim jongu kam long satia kaba laitluid kumba long kiwei kiwei ki jingthaw jong u Blei.U shah teh shah khum ha ki ain ki kanun bad ki kyndon bapher bapher ba thaw bad leh hi da u briew.U dei u jait jingthaw uba teh hi da lade ia lade.U jynjar hi,u sohsat hi bad u khuslai hi kat shaba phai.Kane ka jingleh bad thaw jingbriew(man made destiny) ka pynkulmar lut ia ka jingim,ka khih ka kamai,ka trei ka ktah bad ki kam ki jam baroh.Don kiba ong ba hap shu ia kohnguh bad sngap beit kata pyniaid u Blei,hynrei kata,kam dei satia kumta.U briew u hap kohnguh ia ki ain,ki hukum bad jingpyniaid briew(man made laws) khlem tip pat ba kata ka jingleh jingbriew ka pynsngewsih pynban ia u Blei uba la thaw bad ai ia ka mon kaba laitluid bad ka pyrthei kaba kylluid ia baoh ha kane ka pyrthei.

Ka jingpyrkhing ka sorkar ia ka lockdown ha kine ki por ia ki paidbah kadei kawei na ki jingteh jingkhum kyndon jong u briew ia u briew da u briew hi.Ym long khih ym long ksar,ym long kamai ym long kajih shuh,ym long iaid ym long ieng shuh,ym long shuh ban trei ban ktah,ym long iajuh- iajan shuh,ka la pyniap ia ka jingiatip lem u briew baroh, l la ha ka iap ka im kum u jingthaw ba don jingiatip lem(man is a social beings).Mynta pat, sah lut lut ha ka dum ka lyngngoh baroh.La shaiong lut baroh,namar lada shong ruh jhieh,la ieng ruh kynduh.Kane ka dei sa shisien pat ka jingwan biang ka Juk jong ka Diengiei ba u khla u wan jliah man la ka miet khlem lah pynkhyllem shuh ia ka.Ka lah ruh ban dei ka Juk ba ka sngi(ka Hok)ka la leit rieh noh sha krem ‘lamet sha krem ‘latang.

Hato,don ba pyrkhat kum ia kata? Ki stad ki biej hangne ki kren bad batai da kumwei pat.Teng teng ki stad ruh ki kylla biej bad ki biej pat ki kylla stad pynban.Ngim lah ia batai shuh,ka jingngeit biej(superstition) ka don hateng hateng wat ha kiba shai bad ba stad ruh ym dei satia tang ha kiba biej ba them.Lada dei shisha ba ka sngi (ka Hok)ka leit rieh sha krem ‘lamet sha krem ‘latang,hap ia wad ia u ksiang ban leit khot biang ia ka lym kumta ka jingdum kan iai bteng sah da ki bun snem.Lane,lada ym lah ban pynkhyllem ia kane ka Diengiei jong kane ka juk mynta,u khla un iai jliah sah man ka miet,bad ngin hap ban wad ia ka sim Phreit ba kan batai lem iangi u khun bynriew lym kumta kane ka jingdum kan iai neh iai sah shen ha kane ka jinglong umdum jong kane ka pyrthei ha ki snem kiban dang wan nangne sha khmat ter ter.