Ka pyrthei, ka don ha ka jingshong syier kaba jur, na ka jingshit tasam ka mariang, ong u heh ka UN

United Nations: U Antonio Guterres, Secretary General jong ka United Nations, ula maham tyngeh, hynnin ka sngi, ba ka pyrthei, ka don ha ka khep jong ka jingma kaba khraw lane ha thmit jong ka jingiap kaba shyrkhei, namar jong ka jingkylla jong ka jingshit jingkhriat ha ka pyrthei hi baroh kawei bad u kynnoh pyrshah ia ki 20 tylli ki Ri, ba riewspah tam jong ka pyrthei, ba kim shym la leh eiei satia, ban pynduna, ia ka jingshit tasam jong ka pyrthei.

Utei u heh duh jong ka United Nations, u ong ba ka jingmih jong ka lyer khluit, ka dang iai kiew bad ka nang iai kiew bad ka la dei ban don ka jing pynduna, na ki ri kiba riewspah jong ka pyrthei, kiba pynmih bun bah ia kane ka lyer khluit, ong u heh duh ka UN, namar ba kane kan ktah jubor ia ka ioh ka kot jong ka pyrthei shi tyllup.

Katei ka jingkren jong u heh duh ka UN, ka dei, ha ka sngi sdang jong ka jingialang ha Kinshasa, ka nongbah jong ka Congo, kaba pynkhreh ia ka jingialang bah ha Egypt, ka ban long ha U Naiwieng, u ban wan. Ka dei ka por, ha kaba ka jingshit jingkhriat, ka la ktah jubor ia ka pyrthei, kaba la pyni, lyngba ki dak ki shin, ba ka Pakistan, ka la shlei um, haduh shi bynta na ka lai bynta jong katei ka Ri, ha ki khyndiat taiew ba ladep bad nangta, sa ka jingshit kaba jur tam ha Europe, ha ki 500 snem ba ladep, nangta sa ka eriong bad ki jingshlei um ha Philippines, Cuba bad ha U.S, ha ka jylla Florida.

U Guterres, u ong ba ka jingialang jong ka COP27, ha Egypt, ka dei ban shim ia ka rai kaba shai kdar, halor ka jingduh jingjulor na katei ka jingkylla ba kynsan jong ka mariang.

“Ngi don ha ka khyllipmat, kaba eh bad kaba syier shibun, na bynta ka bha ka jinglong jingman jongngi, kaba mynta bad ka lashai, ka ban sa wan” ula ong shuh shuh.