Shillong: Ka Khasi Students’ Union (KSU) Narpuh Circle hynnin ka janmiet, ka la ioh ban pynlong ia ka prokram ai khublei kitbok kitrwiang bad ai mynsiem ia u samla Mihsalan Truh uba na Lumshnong uban leit ia shim bynta sha ka Asia Youth International Model United Nations ka ban long ha Kaula Lumpur (Malaysia). Uba la soi bad ka United Nations Environment Program (UNEP) uba shah jied ban mih khmat ia ka South Sudan Country, kane ka program kan sdang naduh 25th haduh 28th mynta u bnai. Ka theme jong kane ka program ka long ” Human Security Agenda in the Globalized World “.
Ki don haduh 35,000 ngut ki samla na ki ri ka pyrthei kiba aplai ban ioh ia shim bynta ha kane ka lympung, hynrei tang 1567 ngut kiba shah jied bad une u samla u long uwei napdeng kitei kiba la shah jied. U Mihsalan Truh u dei u samla ba dang pule klas twelve ha Shillong Commerce College . U dei u khun ka Moidellin Truh bad u kpa jong u, u (L) Harding Shylla.
Ha kane ka program ba lyngkot ba la pynlong da ka KSU Narpuh Circle, la iadonlang u samla SS Niangti Fin. Secretary KSU JHDU , samla Charity Suja GS KSU JHDU, u Hamlen Rymbai, u Satley Ryngkhlem V. President KSU Khliehriat Circle uba dei ruh u Rangbah shnong Wapung Skur uba long ruh u President Synjuk Waheh Chnong EJH bad u samla Ohiwet Rymbai Fin. Secretary KSU Khliehriat Circle. La pyniaid ia kane ka jingialang ba lyngkot da u President ka KSU Lumshnong Unit u Hame Gympad. Kum ka dak jong ka jingai mynsiem ia une u samla, ka KSU Narpuh Circle ka la ai jingiarap da ka pisa kaba 10,000 tyngka kum ka jingai barit. U President ka KSU Narpuh Circle u bah KS Suchiang bad u Sanatomba Bamon General Secretary ha ka jingdonlang ki dkhot, kiba ha ing ha sem jong u, ki riew rangbah jong ka shnong Lumshnong katto katne ngut bad ki longkmie la ai ia kane ka jingiarap. Na ka liang u Mihsalan Truh u pynpaw ka jingsngewnguh ia ka seng na ka bynta ka jingai mynsiem bad jingiarap. Ha kane ka jingialang ba lyngkot ba la pynlong ha ing club Kotsati Lumshnong, la ai jingkren na ki nongialam ka KSU JHDU, KSU Khliehriat Circle, KSU Narpuh Circle bad na ki nongialam shnong Lumshnong.
Phi don ban ong eiei?