|
Shillong: U Myntri Rangbah ka jylla u Conrad K Sangma mynta ka sngi u la pynbna ia ka prokram 100 sngi ne ka 100 Days Programme ha ka jingialang rakhe ia ka jingdap 47 snem ka Meghalaya ha State Central Library, Shillong.
Ha ka jingkren kum u kongsan ha kane ka sngi u Conrad uba ai khublei ia ki paidbah, u la ong ba khnang pynsah nam ia kane ka sngi rakhe ia ka “Meghalaya” ka sorkar kala rai ban pyntrei kam ia ka “100 Days programme”, ha kaba yn wanrah ia ka jingkylla hapoh Secretariat da kaba pyndon kam ia ki Led Light. “Ia kane yn pyntreikam da kaba iatreilang hapdeng ka sorkar bad ki riew shimet ne PPP mode na ka bynta ki ding surok ban pyndon kam noh da ki bul Led kiba bam duna ding”, la ong u Conrad. U la ong ba ha kine ki shispah sngi, ka sorkar kan wanrah ia ki kali kiba pyndon kam ia ka ding bad ia kane yn don lai ne saw tylli ki jaka ban ai jingbam ne charge ia ki kali bad kane kan long ruh ia kiwei kiwei ki tnad sorkar ba dei ban lah ban leh ei ei hapoh kine ki shispah sngi. “Ki ophisar ki dei ban ban pyni ba ka sorkar ka don ka jingkut jingmut ban trei na ka bynta ki paidbah ka jylla”, u la ong. U la ong ba ka sorkar kan khring ia ki briew nabar ban wan bei pisa ban seng kam ha kane ka jylla. U la kynmaw burom ruh ia ki nongialam kiba mynshuwa kiba la ialeh ban pynioh ia kane ka jylla kaba mynta, ha kaba la ialeh ba jai jai. U la ong ba ka donkam ban buh thup ia ki jingthoh ha kaba iadei bad ka jylla shuwa, ban lum thup ia ki jingthoh ki dur, shi bynta kum ka jingpynkhreh ka jylla ban rakhe ia ka jingdap 50 snem. U la ong ka sorkar kan pyntreikam ia ki prokram bapher naduh ka tnad ka koit ka khiah, ka kam jngohkai, ka rep ka riang bad kiwei na ka bynta ban kyntiew ia ka ioh ka kot jong ka jylla . |
