KA POR SAMLA KA POR KSIAR NYLLA

DA U SAMLA JEREMIIA DKHAR

Ka por ka dei kaba kordor tam ha ka jingim jong ngi ki briew. Ka por kam ap iano iano pynban ka iaid beit kam don jingsangeh. Ía ka jingim jong ngi ki briew la pyniasyrngiem bad ki saw tylli ki por ne ki saw aiiom ha ka shisnem kata ka dei ka pyrem, synrai, lyuir bad tlang namar ha ka jingim jong ngi ki briew ruh ka don saw bynta ka por khunlung, khynnah, samla bad tymmen.

Ka por khunlung ka dei ka por ha kaba ngi dang lui lui,shisur bad khuid mynsiem bad ngim pat tip eiei ha ka jingim. Ka por khynnah ka dei ka por kaba ngi dang shaniah nadong shadong ha ka jingpyniaid i mei bad i pa. Ka por samla ka dei ka por kaba ngi hap ban mat ia shibun ki jingeh, jingjynjar bad ki jingtynjuh ba har-rukom namar kane ka dei ka por ksiar por rupa ban pynkhreh ialade ban ieng ha la ki kjat. Bad ka por tymmen ka dei ka por ka ban tei ia la ka ing ka sem bad ka lok ryngkat ki khun ki kti kum ka longing longsem kaba dei ka nuksa ia kiwei ki marjan marpa.

Napdeng kitei ki saw tylli ki por kiba donkam ha ka jingim jong ngi ki briew,ha kaba baroh saw ki por ngi hap ban iaid lyngba lut, ka por samla ka dei ka POR KSIAR NYLLA namar dei ha kane ka por ba ngin rai la ngi kwah ban suk, ban bha,ban jynjar lane ban long briew ne long mrad ha ka lawei jong ka jingim jong ngi iwei pa iwei.

Ka por samla ka dei ka por kaba donkam tam ha ka jingim jong iwei pa iwei i briew namar kane ka por ka dei ka por ban pynkhreh bha ia lade,la ha ka pule dangle, wad kam wad jam, bylla sngi bad ban kunai la ka ioh ka kot, ban iarap ia kiba ha ing ha sem ki hymmen para, bad ban noh synniang da ka jingshemphang,ka jingnang jingtip bad wat da ka bor met ia ka imlang sahlang,ka ri bad ka Jaitbynriew.

Ka por samla ka dei ka por kaba dang khlain bha ha ka pyrkhat pyrdaiñ, ha ka bor met por phad, ha ka jingiohi jngai bad ha ka jingshemphang lada ngi don ka mon bajwat ban leh ia kano kano ka kam naduh mynsiem kam don jingeh jingtynjuh kaba lah ban khanglad pynban ka shong pat ha ngi iwei pa iwei la ngi kwah ban leh sniew ne ban leh bha ban sah ka nam jong ngi shiarta.

Ka por samla ka dei ka por kaba pynkynmaw sah bad um lah ban pynklet ia ngi iwei pa iwei namar ha kane ka por ngi mat ia shibun ki jingkmen jingsngewbha pahuh kyrhai.Ka por samla ka dei ka por kaba sakma ne bym thikna bad kynmaw than ia kiba ha ing ha sem,ia ki hymmen para bad ia i mei i pa namar kat shaba phai tang ki lok kyrhai pynban kane ka por ka dei ka por ban ai ia ka rai bapaka ia ngi iwei pa iwei ban sniew ne ban bha ha ka jingim.

Ka por samla ka dei ka por kaba kwah tang ban pynsngewbha ialade ym da pyrkhat than ia kiwei. Kane ka por ka dap tang da ki jingpynshoi, jingtynjuh bad ki ktien jali jaum na ki paralok ban pynphlop bad pynngop ia ngi ha ki kam sniew ba laiphewjait bad lada ngi ngop ha kine ki jingriam kiba sniew ba laiphewjait lyngba ki lok kiba ngi thoin, kiba ngi shaniah tang kata hi la kut ka jingim ban pynsohsat bad pynjynjar ia ngi shi-arta. Dei na kane ka daw ba ngi dei ban da jied bha ia ki paralok ban ia iaid ia ieng ryngkat namar ka jingim jong ngi ka shong ha ki kti, ki kjat, ki jingmut jingpyrkhat jong ngi ban leh ban kam,ban iaid ban ieng ban pyrkhat pyrdaiñ bha ym ban taria ruma.

Khatduh iawai, nga kwah ban kyntu sha baroh ki paradoh parasnam bad ki samla kynthei bad shynrang ka Bri u hynniewtrep ba ngim dei ban PYNLEHNOHEI ia ka por samla ne shah IALAM BAKLA la ha ki kam sniew ne kam shongkha ban tip bha tang ia i snam bapaka,ban nym iaid BAKLA ne iaid SAKMA bad ban nym tur RUMA khlem da PYRKHAT BHA ne PYNTHIKNA ha ka lynti bym dei hynrei ba ngin long ki samla kiba bha,kiba iaishah, kiba iohi jngai, kiba iaineh, kiba kyntiew ia ki paradoh parasnam bad ban ialeh khlem kynran dien ia kaba dei,ban shakri da ka jingieid ia ki paradoh parasnam,ka dong ka thain ka RI bad ka JAITBYNRIEW HYNNIEWTREP ban long ki nuksa ia ki longdien ki ban dang wan,ban tei ia ka lawei da ki nuksa kiba bha khnang ba ngim nym babe kylla.