“Ka por jong ka jingrongnoh”

AIS SUJA

Ha kane ka pyrthei, kan don ka por ka jingrongnoh (Rapture). Ka jingrongnoh ne tuh noh ia kiba la pynkhreh man ka sngi ia la ka jingim ne ia ki ba la leit sait khuid ialade ha ka snam u khun langbrot. Ka jingrongnoh kan ym jia ia baroh, hynrei tang ia kita kiba la pynkhuid ia lade, na kiei kiei ki jong ka pyrthei. Ka jingrongnoh kan ym jia shwa, hynrei kin mihpat shwa kiba iap bad yn rong noh sha suin. “ ……. Kita kiba la iap ha u Khrist kin iamih pat shwa. Ynda kumta ma ngi kiba dang im ia kiba la pynsah, yn rongnoh lem ia ngi lem bad ki HA KI LYOH ia ka ban iashem ia u Trai ha suinbneng” 1 Thessoloni 4:15-17.

Kane ka por jong ka jingrongnoh, kan jia hamar ka por kaba shiteng jong ki 7 snem ki Jingjynjar bah (great tribulation period) ia kaba u Daniel u ong – “ka shitaiew kaba khadduh” Daniel 9:27. Kine ki 7 snem ki don mar lai snem shiteng, kaba Nyngkong bad kaba Ar. Kaba mut mar ia kut ki Lai snem shiteng ha kaba ki Jiw kin ioh ban ai jingknia jingainguh hapoh kata ka Temple kaba Lai ia kaba kin sa pynieng noh shen. Kaba kut ki Lai snem shiteng kaba Nyngkong kan long ruh ha kajuh ka por ba yn sa pynhap ia u soitan Lucifer sha khyndew. Jingpynpaw 12:7-9. Kaba mut, ia u soitan Lucifer yn sa pyhap sha khyndew, kiba hok ba im bad ba iap yn rongnoh sha suin. Bad kin ym ioh ban mad ia ka jingjynjar bah.
Ka long kaei kaei kaba sngewtynnad bad sngew shyrkhei lada ki Jiw kin tang ioh ban pynieng pat ia kata ka Temple ba Lai ha Jerusalem. Namar ka jingknia ki Jiw da ki mrad kan ym don jingmut ei ei shuh namar u Blei um pdiang shuh ia ka jingknia da ka snam ki mrad.

Hynrei kane ka Temple kan long beit tang ia u soitan Lucifer ba un leit shong hangta ba un leh ialade kum u Blei hapoh ka por 1290 sngi. Daniel 12:11. Hapoh kane ka Temple u soitan Lucifer un shong bad leh ialade kum u Blei. 2 Thessoloni 2:4.
Kumta kita kiba la pynkhreh ialade naduh mynta, la ki im ne iap, kin don bynta ha kata ka jingmihpat, bad Jingrongnoh. Namar ka Jingmihpat bad Jingrongnoh kan jia ha kajuh ka khyllipmat jong ka por. “Ha khmih nga iathuh ha phi ia ka JINGMAIAN: Ngin ym ioh thiah (iap) baroh, hynrei yn pynkylla ia ngi baroh shi syndon ha kaba shi khyllipmat kein ha ka TUROI KABA KHADDUH. Namar ka Turoi kan sawa ynda kumta IA KIBA IAP YN PYNMIHPAT KI BYM PYUT, BAD IA NGI YN PYNKYLLA” 1 Korinth 15:51-53.

Haba shu bishar ia ki DAK KA POR, kiei kiei baroh ki long hajan eh. Na kata ka daw wat sngew sarong ha kane ka jingim ba mynta khlem da tip ia u Jisu Khrist, bad khlem da pdiang ia u. “To u Riewstad un ym sarong ha la ka jingstad, uba khrawbor un ym sarong ha la ka bor. U Riewspah un ym sarong ha ki spah jong u” Jeremaiah 9: 23 -24. Namar kine kiei kiei kin kut noh ha khyndew bad kim lah ban ialam ia u briew sha kata ka bymjukut ka ban sa wan. Ka bymjukut te ka don ar bynta. Bymjukut ha Bneng ne bymjukut ha Dujok ding. U briew u hap ban jied kawei na kine namar u Blei u la ai ka mon laitluid ba u briew un jied.
Ngi im ha ka juk ka jingstad, u Daniel u ong- “Haduh ka por jong kaba kut kein, BUN KIN IAPHET SHANE SHATAI, BAD KA JINGTIP KAN ROI” Daniel 12:4. Ngi im ha ka juk kum ka juk u Noah. “Te kumba la long ki sngi u Noah kumta ruh kan long ha kata ka sngi ka jingwan u khun u briew (Jisu)” Mathaios 24: 37-39. Ka juk ba ngi im ka long kum ka juk u Lot – “Kumba la long ha ki sngi u Lot, ki la iabam ki la iadih, ki la iathied ki la ia die, ki la iathung ki la iatei, hynrei ha ka sngi ba u Lot u mih na Sodom, u Blei u la pynhap slap da ka ding bad da u kyndok na bneng, u la pynjot ia ki baroh” Loukas 17:28-29. Bishar bad to khmih bha ia ki por ba ngi im ki long ki sngi khadduh kum ki sngi u Noah bad ki sngi u Lot. Kumta ngi donkam ka jingstad jingshemphang na ka ktien u Blei khnang ba ngin lah ban iohi ba ka por ka la lyngkot eh ia kiei kiei baroh.

Ka ktien u Blei ka pynkynmaw da kaba ong – “TO KYNMAW PHI IA KA TNGA U LOT” Loukas 17:32.
Ka jingrongnoh bad jingmihpat kiba iap ka la nangjan, ki por kaba kut kiei kiei ka la hajan, namar kan jia hashwa ka jingjynjar bah (great tribulation). “Naba hangta ka kordit bah kan long kat kaba ym pat ju long na myndang long ka pyrthei haduh mynta em, LYMNE KAN YM LONG SHUH RUH” Mathaios 24:21.
Ka por jingmihpat bad ka por jingrongnoh kan sa long ka por kaba pynkulmar ia ka pyrthei namar ki jingsheptieng bad lyngngoh ia ka jingjah kynsan ki briew ha kylleng ki ri ka pyrthei bad ki briew ki bunkam ban iawad ia kiba la jah namar ki bym shah rongnoh kim tip kaei kaba la jah, kim tip ruh ba u Blei u la pynkynriah ia ki shatei sha suin, namar u soitan u Mradkhlaw un wan synshar dusmon 1290 sngi ia kane ka pyrthei – ka por ka jingjynjar bah kein ka bym pat ju jia na myndang long ka pyrthei. Mathaios 24:21.

“Kata ka ia ka long hajan. U BYM HOK TO UN NANGLEH BYM HOK. UBA TNGJT TO UN NANG TNGIT. UBA HOK TO NANG LEH HOK. UBA KHUID TO UN NANG LEH KHUID. Jingpynpaw 22:10-11. HA KHMIH NGA WAN KLOI. Jingpynpaw 22:12.