KA POR BAM: Kaei ka por kaba biang eh ban bam ban dih

Kong Linda Kongwang

Man ka sngi phi ju pyllut por ban pyrkhat kaei phin bam, phi jied ne wad iaki bam kiba biang eh hapdeng ki soh, ki jhur, ki proteins bad baroh ki jingbam tei met. Hynrei hato phi la juh pyrkhat ha kano ka por dei bam?

Ban bam haka por kaba biang man la ka sngi kan ai shibun ki jingmyntoi iaphi. Nyngkong eh kan iarap iaphi ban ioh iaka met kaba koit kaba khiah, kan kyntiew iaka jingkhlaiñ jong ka bor met bad haka juh ka por kan iarap ban ialeh pyrshah ia bun jait ki jingpang haka met. Hynrei kumno phi pyrkhat, kaei ka por kaba biang tam ban bam?
Hangne ngi la iohlum katto katne ki jingai jingmut ban iarap iaphi ban pyrkhat iaka por kaba biang tam eh ban bam bad ruh katto katne ki jingai jingmut ban pyrshang ha kaba iadei bad ka rukom im mynta ban ioh iaka met kaba koit kaba khiah. Leh iakine ki jingmyntoi nakine ka jingai jingmut harum:—

1. Ka ei ka pot kaba biang tam eh ban bam step:– Phi la juh iohsngew hi man la ka por ba ka bam step ka dei ka ba kongsan tam na baroh ki por bam baroh shisngi, bad kadei ruh ka jingshisha namar ka bam step kalah ban pynbit pynbiang iaka blood sugar jongphi naka bynta baroh shisngi lyngba ki jingbam ba nyngkong jongphi naduh ba khie thiah.
   Phi dei ban bam la kumno kumno shi kynta hadien baphi la khie naba thiah ban pynioh iaka step bad iaka met kaba koit kaba khiah baroh shisngi. Kapor hapdeng 6 baje haduh 10 baje mynstep kan dei ka por kaba biang tam eh ban bam step khamtam phin iohpor ban pynbit pynbiang iaki jingbam sngi hadien katto katne por.
   Ka ei kaba phi bam haka por step ka don ka jingiadei kaba khraw bad kaba ai jingmyntoi iaka koit ka khiah jongka met baroh shisngi. Lada phi kwah ban kiar na kino kino ki jait blood sugar kiba lah ban teh lakam iaka jingkiew bad jinghiar jong ka blood sugar baroh shisngi te kiar naki jingbam iaki pastry, ki jingbam khleiñ bad ki kynja jingbam thiang haka por step. Jied iaki jingbam step kiba don kyrhai ki proteins kum ki atta ne kew lem bad ki peanut butter bad ki straw berries.
2. Ka ei ka por kaba biang tam ban bam sngi:-– Ban pynjah iaka jingtyrkhong jongka met, ka metabolism ka donkam beit man ka sngi hapdeng ka 10 baje haduh 2 baje. Shim iakane ka kabu bad pyndonkam ban bam ja sngi hapdeng kine ki por ban ioh iaka bor met ba shapoh kaba shait ba khlaiñ.
3. Ka bam sngi kadei ban kham duna ban iaka bam step ne bam miet. Phi donkam ban pynleit jingmut hakine ki por, namar khambun naphi phi don haki jaka trei ne jaka pule. Hakajuh kapor phin ym don por than ban pynkhreh bam ialade mynsngi, te phi lah ban song daki jingbam kiban pyn kdang iaphi kun ka ja ne atta ban ym tlot ka met ka phad.
4. Ka por kaba biang ban bam janmiet: Shuwa ban poi ka por bam miet ka por janmiet ruh ka long kaba donkam ban bam ban pyllait naki jingtyrkhong jongka met. Hangne phi lah ban bam ki jingbam malu mala kum ka sha, ki umsoh, ki biskit bad kiwei kiwei kiban teh lakam iaka jingtyrkhong jongka met. Ka por bam janmiet ka dei ban long hadien 2 ne 3 kynta naka bam sngi bad phi lah ban bam ban dih hapdeng 4 baje haduh 6 baje janmiet. Kiar nakaba bam kdang hakine ki por khnang ba phin pah ban bam bha haki por miet. [yn dang bteng]