Ka Pool parti ha Umbir, kaba thmu ban ialam sha ka jinglong Nuti, ong ka FKJGP

Shillong:Ka FKJGP Seng Kmie ka pyrshah jur ia ka jingthmu jong katta katne ngut ki briew ban pynpoh dor iaka jaidbynriew Khasi, da kaba pynlong ia kata ka “Pool Party”.
Da kaba thmu ban pynlong ia kane ka “Pool Party” kane ka tamasa kan thad ia ka long rynieng jong ka jaidbynriew.
Ka FKJGP ka khang ban thad iaka Jaidbynriew kum ka Seng bad ka Jaidbynriew kan pyrshah jur ia kum kine ki tamasa ba pynpoh dor ia ka longrynieng jongka Jaidbynriew baroh kawei.
Ka Pyrthei baroh kawei ka kyang Shla ia ka jingthmu ban pynduh ia ki tamasa kiba sdang ban ialam sha ki lynti jongka jinglong Nuti, hynrei hangne ha Ri Hynñiewtrep ba Tip Blei Tip Briew bad Tip Kur Tip Kha, la sdang ban wanrah ki dustur pohjait poh rati jong ki Nongwei.
“Ngim kwah ba ki Thei Hynñiewtrep bad Rang Hynñiewtrep kin ngat ha ka lali, lada phi dang dei ki khun u Hynñiewtrep ngi kyrpad jur wat leit shim bynta ha kum kine ki tamasa thad long rynieng” ong ka kyrwoh. Lane iathuh ba kane ka “Pool Party” ka dei kaba la pyniaid da ka Ultra Socialites bad kaba dei ban pynlong ha Umbir UCC Road Umbir Ri-Bhoi.