Nongpoh: U Bah Sanbor Shullai, Chairman ka Meghalaya Tourism Development Corporation (MTDC), hynnin ka sngi u la leit ban plie paidbah noh ia kawei ka jaka jngohkai pyrthei kaba la tip kum ka Pnahkyndeng kaba don hapoh ka Law Kyntang kaba hap hapoh ka shnong Pahamskhen, Raid Nonglyngdoh, Ri-Bhoi District.
Ha kaba leit ban plie paidbah ia katei ka (Pnahkyndeng) ka jaka jngohkai pyrthei kaba shen kan sa pawnam na ka jingdon shibun tylli ki krem Lymbit, la sakhi da ka jingdon u Bah Mayralborn Syiem MLA Nongpoh, u Bah Balajied Ranee MDC Nongpoh, u Bah Plielad Tiewsoh Chairman ka RBTEDF lem bad shibun kiwei ki heh ki hain, kiba kynthup naduh ki nongialam Raid, shnong bad kiwei pat.
Na kaei kaba la lap ha katei ka sngi kaba la plie paidbah ia katei ka jaka jngohkai pyrthei, lah ban ong ba kan sa dei shisha kum kata ka jaka jngohkai pyrthei kaba kham pher na kiwei pat ki jaka jngohkai pyrthei ha ka jylla, namar hapoh katei ka jaka, ki don shibun tylli ki ‘Krem Lymbit’, kaba ki briew kiba kwah ban peit ia ka jingshisha halor ka jingdon da ki phew phew hajar tylli ki Lymbit, ki lah ban iohi ha katei ka ‘Kren Lymbit’.
Nalorkata, ha katei ka jaka jngohkai pyrthei ka jaka ka long kaba pyngad, da ka jingdon ki dieng ki siej, ki mrad ki mreng, ki syntiew ki skud, ki jait dawai kynbat ba har rukom, ki Maw synduk, ki jaka lehniam ki mynbarim lem bad kiwei.
Da shisha ban leit sha katei ka jaka kan long kaba kham jynjar, namar ka jingbymbiang ka surok iaid kali bad kaba lah ban ong ba ka por kaba long ban leitkai sha katei ka jaka, ka dei tang ha ki por tlang, lait nangta ki kali kim lah ban poi sha katei ka jaka. Ka la don ruh ka jingkren na ki riew tymmen ba kino kino ki briew kiba kwah ban leit peitkai sha katei ka jaka ba kim dei ban leh kulmar, ban kren ki ktien khlem akor bad ban leh jakhlia, namar ka dei ka jaka kaba ki mynbarim ki khein ia ka ba ka dei ka law Kyntang.
Phi don ban ong eiei?