Ka pliang ja

Bah D Pakyntein

Don bun bah tylli ki skhim ba la pynmih da ka sorkar kmie, bad na kita, ka don ka Central Sector Scheme kaba ka sorkar kmie ka bei pisa 100 na ka 100. Nangta sa ka Centrally Sponsored Scheme ha kaba ki jylla ki hap noh synniang lang tang khyndiat kata 10 ne 20 ne 30 na ka 100. Barabor ki jylla shatei lam mihngi kin hap noh synniang tang 10 na ka 100.

Dang shen ka Indian Council of Medical Research (ICMR) National Institute of Nutrition, ka lah pynmih ka kaiphot, bad ki kyndon jong ka Expert Committee Members, kaba iadei bad ka bam ka dih kaba ki khot “My Plate for the Day for 2000 Kcal”. Ha jylla Meghalaya, kumba 90 na ka 100, ki bam da ka ja, doh bad jhur, te yn ai kyrteng kumne “Ka pliang ja ha ka shi sngi ban ioh 2000 ka bor”. Kane ka pliang ja ka dei ban don 250gm ki Cereals (u khaw, u kew, u riewhadem, ter ter) 85gm ki Pulses (Rymbai ja, shieng presbin ter ter, bad 30gm lah ban ioh na ka doh, dohkha bad pylleng). 300ml ka dud/doi, 400gm ki jhur, 100gm ki soh, 35g ki shana bad symbai, 27gm ka khlein bad umphniang. Kane kam mut ban bam shisien bam, hynrei baroh shi sngi, bad ki jingthew ki long kat kum ka rta.

Katno tharai kane ka pliang ja kan shong dor? Hynrei hap pyrshang ban bam ba ha katei ka kaiphot ka ICMR ka ong ba 56.4% ki nong India ki ioh pang, namar bym biang ka bam ka dih. Ka dei hangne ka sorkar kmie ka don ka Pradhan Mantri Garib Kalyan Anna Yojana (PMGKAY) Scheme, ka ICDS kaba tip kum ka Saksham Aganwadi and POSHAN 2.0 na ka bynta ki khyllung/khynnah ka Pradhan Mantri Poshan Shakti Nirman (Ka bam ja sngi ki khynnah skul) bad kiwei kiwei, ki skhim, kiba iadei halor ka koit ka khiah. Namarkata, la pynlait paidbah ia ki jingbam babha ba don kita ki bitamin/dawai poh khyndew(minerals) ba tei ym tang ia ka met hynrei ka pynproh jabieng ruh (fortified food) lyngba ki dukan rashon.

Ha kane ka Committee, ki don ki briew kiba kynsai na kiba kynsai tam. Ka lah trei bor bah, haduh ba ka kaiphot kaba ka ai, ka dei kaba janai bha, bad ka la pynsuk ia ki sorkar jylla ha ka Ri. Ka don palat spah sla. Ha kane ka dorbar mang tangka (Interim Budget) ka Ri India ba dang shu dep, ka jingmang tynka, ka duna palat, lehse ka lah ba ym dap lada hap ban bud ia katei ka kaiphot, hap ruh ban peit ruh ia kiwei ki jongdonkam. Ka Ri jong ngi ka dei kaba donbok bha, namar lah jan mar shiteng la tawiar da ki duriaw bah. Ki dohkha duriaw ki don ka dawai bah.