Ka pla pei thliew!

AIS SUJA

Ka pla pei thliew! Baroh ngi tip kaei ka pla pei thliew. Ka long ka pla kaba ym ju neh kaei kaei kaba ngi buh ne thap, bad kata ka pla kam ju dap lano lano ruh. Bad ka long kaba ban thep eiei ha kum kata ka pla kaba pei thliew, lada kandei kamar kaba tad dor ne remdor, ngin duh noh ia kata kamar namar kat nangthep katta kan nangjah.

Halor kane ka pla pei thliew, ka ktien u Blei kadon ban ong kumne; “Phi labet shibun, phi la lum khyndiat. Phi bam hynrei phim kdang, phi dih hynrei plum jeh sliang, phi kup ialade hynrei ym syaid, uta uba ioh bainong ruh u ioh bainong tang ban BUH HA KA PLA BA PEI THLIEW. Haggai 1:6.
Kane ka dei ka jingogn halor ki khun Israel ha ka por jong u Prophet Haggai, uba long u prophet ha ka por ba la tei ia ka Temple kaba Ar ha Jerusalem. U Haggai udei u jaid Hebru hynrei lakha ia u ha Babylon. Dei ma u hi ba lathoh ia ka kitab u Haggai. U la long u prophet ne u Nongiathuhlypa ha Israel haki snem 520 B.C.

U Blei u la phah ia u Haggai ha Judah bad Israel bad kren ia kine ki kyntien ban maham ia ki shaphang ki por kiba eh, ki por jingkyrduh, ki por jingshitom kein ha ka Ri baroh kawei na kidaw ka jingleh klet ia u Blei uba im. U paid Israel um bna ne buh jingmut ha ka ban tei ia ka Temple U Blei ki la im ka jingim bym tip briew tip Blei, ki la sakma kylleng ha la ki jong ki jong ki jaka, kim don ka mynsiem ban kynmaw ia ka Temple u Blei, hynrei ki ong pynban – “ ka por kam pat poi ban tei iaka ing u Trai” – Ki im ka jingim kaba iohthiah lyngngai khlem u Blei, hynrei ki pyllut bun ki por ha ki kam ki dup la jong, ki ia beh ia ka spah ka pyrthei da ka jingthmu ban im suk ban dap ban biang, hynrei kam long kumba ki thmu, kiei kiei ki kylla khongpong lut, ka daw ka long ba ki la leh klet ia u Blei uba la kular ban kyrkhu ia ki.

Nakata ka daw u Blei u la phah ia u Prophet Haggai ban iathuh ban pyrta ha ki ha kato ka por. U ong ba nakadaw ka jingbymsuidniew ia u Blei bad ia ka Temple jong u, U Blei u la bitar bad u la khate noh ia kiei kiei baroh. Phi bet shibun hynrei phi ot tang kyndiat, phi bam hynrei phim kdang, phi dih hynrei phim ju sliang, phi kup hynrei phim syaid, phi ioh bainong hynrei phim dap namar phi buh ha ka pla kaba pei thliew jong phi. Phi la khmih lynti ban ioh shibun hynrei ha khmih ka long tang khyndiat. Haggai 1:6-9.
Ka long kaei kaei kaba shyrkhei ban pyrkhat haba ki briew ki klet noh ia u Blei. Kane kajuh ka jia ha kine ki sngi kiba khadduh. Bun na ngi baroh lang ngi shem ia kane kajuh ka jingeh hakine ki sngi, kumba ki Israel ki la shem hyndai. Bun ngi ia ud sat ha kine ki sngi ba kane ka jia kumta, ioh tang kat ban bam ngi ong. Ki nongrep ki ud, ki nong khaii ki ud, ngi ong ka sinew ka khaii pateng kadie ka thied (Bad economic times) ngi khmih lynti ban ioh bun, hynrei ioh pynban tang khyndiat.

U Blei u ong – Namar ka ing jong nga ka la long ing jah, phi la phet uwei pa u wei sha la ka jong ka ing. Haggai 1:9. Mynta ruh bun ki briew ki klet ia u Blei, ki pyllong ing jah ia ka Temple u Mynsiem Bakhuid u Blei (Ka ba long ka met u Briew) ngi la ia phet sha la ka jong ka jong ka ing, hala ki jong ki jong ki jingmut jingpyrkhat kiba ngi iabeh ha kine ki sngi ba mynta bad ngi klet pat ia u Blei. Ngi klet ban pyrkhat ia kaei kaei kaba kynja mynsiem hynrei ngi pyllut bun ia ka por ha kiei kiei kiba kynja doh. Dei nakata kadaw ka pyllong ia ka pyrthei ban long kumba long mynta.

Ha kito ki por u Blei u bitar, bad u bitar mynta ruh. Ha kito ki por u Blei u ong – Nga la khang ia ka umjer ka bneng, la khang ia u soh ka khyndew, bad halor u kew bad halor kawain bad halor ka umphniang, halor u briew halor ki jingri bad halor ki jingtrei ki kti baroh. Haggai 1:10-11.
Kaei kaba ngi iohi ha kito ki por u prophet Haggai ba hadien kine ki nemsniew, ki briew ki la ngeit bad kylla bamut. Ki da kohnguh iaka ktien u Trai U Blei jongki. Haggai 1:12. Kumta la dei ia ngi ruh ha kane ka pateng ban kohnguh ia ka ktien u Blei ban ia ki briew khnang ba u Blei un shem sngewbha na ngi bad u Blei hi un weng noh ia kine ki nemsniew kiba lawan hap wan jia ha kane ka pateng kaba mynta. Lym kumta, uba ioh bainong u ioh bainong tang ban buh ha ka pla pei thliew. Haggai 1:6.