Ka pisa kam duna, ki paidbah kim dei ban khuslai, ong u Ram Meghwal

Shillong 14 Naiwieng:
U Myntri khynnah ka sorkar pdeng ba peit ia ka tnad pla tyngka bad Corporate Affairs u Arjun Ram Meghwal, u la ong ba ka pisa kam duna satia bad ka sorkar kan pynbiang ia ki jingdonkam jongki paidbah.
“Kam don kano kano ka jingkulmar hynrei ka don tang ka jingsngew khuslai namar ba ia mynta ki bank ki dang pynbiang ban sam sha ki paidbah ia kaba dei ban leh”, la ong u U Myntri khynnah ka sorkar pdeng ba peit ia ka tnad pla tyngka bad Corporate Affairs u Arjun Ram Meghwal haba kren hynne ka sngi halor ka jingkhang ia ka lut tyngka T. 1000 bad T. 500.
U la ong ba ia mynta ki paidbah ki sngew khuslai namar ba ki hap ban ieng lain bun kynta ban bujli ia ka pisa bad ban thep hynrei hadien katto katne sngi,ia kane ka jingeh lah ban weng noh. U la ban jur ba kane ka jingleh jong u Myntri Rangbahduh ka ri u Narendra Modi ban khang ia ki lut tyngka T. 1000 bad T. 500 ka long ban khang lad ia ka jingjyllei ki pisa thok bad ka pisa kamai bym hok kaba la pyntroin ia ka ioh ka kot jong ka ri bad ki riew paidbah.
Lah ban kdew ba ka jingpynbna khang u Myntri Rangbahduh ia ka lut T. 1000 bad T.500 kiba rim, ka la pynkhihwin ia ki paidbah ha kane ka jylla haduh ba ki bank kim lah shuh ban pynbiang pisa ha ki ATM ma+shin jongki.
Haduh mynta ka sngi, bun bah ki ATM kiba thylli bad kiba khang namar bym don pisa haduh ba ki paidbah kila ktha khlieh ban leit wad pisa.