KA PISA: Balei ka Pisa ka donkam eh haka jingim?

[ba bteng]

Ka jingsniew jong ka Pisa:—

1. Ho’oid ki don shisha katto katne kiba ka pisa ka pynsniew ia u briew. Ka jingieid palat iaka pisa kalah ban wanrah shibun ki jingeh. Ka jingpyrshang ban ioh pisa ha baroh ki liang daka lynti bymdei kalah ban ialam iaphi shaka jingsniew jinglong ne wat ban long runar kum ki nongtuh lane shukor iakiwei. Kalah ruh ban ktah iaphi bad iaka iing ka sem hi baroh kawei lada phi pynleit jingmut palat halor ka pisa. Lada baroh kaba phi donkam kadei ka pisa hynrei phim don iwei ruh ban iasam iaki jingmut jingpyrkhat bad ka jingim jongphi, kynmaw ba phi dei u baduk bad khuslai tam haka jingim jongphi.
2. Ka pisa ka ialam sha ka jingbym iahap jingmut:—- Lada ha iing ha sem phim don ka jingsngewthuh jingmut halor kumno ban pyniaid iaka pisa, kane ka lah ban buh jingeh haka jingim jongphi. Haka jingshisha ka pisa kadei kaba hakhmat eh kaba ialam shaka jingialait sanshyieng jong kiba bun.
   Bun ki jingjia kim dei eh tang naka pisa hi, hynrei ki pynleh hakata ka lynti baki briew ki ialehkai bad ka pisa. Phi lah ban shim ka jingkit khlieh ha kaba iadei ha kaba iadei bad ka jingioh da kaba ialeh shitom ban buh bha iaka pisa khlem da ailad ba kan ktah iaka jingim jongphi.
   Ka jingpyrkhat na ka bynta ka lawei:— Haba phi sngewthuh ba ka pisa kadei kaei kaei kaba phi donkam man la ka por, kalong kaba donkam ba phin pyrkhat kloi katba lah ban pynthikna ba phi don ka pisa dakaba kunai bha man ka por. Teng teng phin donkam shibun ki pisa ban pyndep iaki jingthmu baha khmat eh jongphi kum ka jingthied iaki iing ne shna iing lane ban siew naka bynta ki jingpule. Ban pynthikna ba phi don biang biang ka pisa ban leh ia kine kiei kiei, phi dei ban don ka thong haka kam pisa tyngka bad ka jingtrei shitom ka long kaba donkam.
   Phi donkam ban pyrkhat naka bynta ka lawei jongphi haba phim lah shuh ban trei ban ktah namar ka jingnoh ha ka rta, ban kunai jaka por kaba biang kalong kaba donkam eh ban lait naki jingshitom pisa.
   Lada phi buh bha iaka pisa, phi pah ban ioh ia kiei kiei kiba phi kwah haka por donkam bad phi lah ban im ka jingim kaba khambha naka pisa kaba phi lah buh tyngkai bha bad phim donkam ban trei shitom haba palat ka rta.Ki stad wadbniah ki ong ba ‘ka jingkwah jong u briew kam ju kut lano lano ruh’, kadei eh namar kata ban pynioh iakita ki jingdonkam phi donkam ban kunai bha ban longshngain haka jingim.