Shillong:U myntri rangbah ka jylla u Conrad K Sangma, ha ka 24 tarik Kyllalyngkot 2024, u la ong ba ka sorkar ka la pynkhreh shaid shaid ban shna ia ka Park kaba heh bha ha Golfilink, ha kaba kan ym ktah tang ia iwei I dieng ruh kiba la don lypa mynta.
Haba kren ha ka jingplie ia ki maw kyrteng ha Vivanta Hotel, Shil long u la ong ba yn shna ia ka Park kumba lai ne saw tylli ia ki paidbah, ki jaka lehkai ban pynbyr ngia ia ki nongwankai. Yn tei ruh ia ka waterfront ne ka pung ban shong lieng ha kaba ki briew kin iaid ki shongkai ruh.
Ha kajuh ka por, u myntri rangbah u la ong ba shwa ban kut une u snem, ka sorkar kan plie ia ka Integrated Command and Control Centre ban don kumba 300 tam ki camara bad ki pyrda ramhah ne screen ban peitngor ia ka iaid ka ieng, ka khih ka ksar jong ki kali ha nongbah Shillong, khamtam ka jingsahkut kali, kaba dei ka bynta Smart City Projek.
“Ka nongbah Shil long kan sa sakhi ia ki jingkylla shen ha kine ki sngi ia ki bym ju iohi mynno mynno ha ka por mynshwa”, la ong u Conrad.
U la ong ba ia ka jingdro dur ia ka Secretariat yn pyndep ha u bnai Risaw mynta u snem shwa ban sdang noh ban shna ia ka. “Ka jingmang ban tei ia ka Secretariat kan ym duna ia ka T. 500 klur tangba ym pat lah ban ioh jingkhein kaba paka namar bym pat dep ia ka jingdro dur ne design”, la ong u myntri rangbah.
Ha kajuh ka por, u la ong ba ka jingshna ia ki jingdonkam ka sor Shillong thymmai naduh ki surok, kiwei ki jingdonkam kan ym duna ia ka T. 2000 klur eiei.
Phi don ban ong eiei?