Ka pakhang shnong, pakhang ophis kim iahap:Mukul

Shillong, 6 Nailur:
U Myntri Rangbah ka jylla u Mukul Sangma u la ong ba ki lynti jingiakhih da kaba pakhang shnong, pakhang surok, pakhang ophis kim iahap satia bad don da kiwei ki lad lada iakhih kiban ym ktah ia ka roi ka par.
“Don bun ki lad ban iakhih kiban ym pynsniew ia ka roi ka par” la ong u Mukul haba kren ha ka jingplie ia ka iing jong ka Mairang Presbyterian Science College ha Lumsohkhlur, Mairang, ka West Khasi Hills District hynne ka sngi.
U la ong ba ka jingpyntreikam ia ka Inner Line Permit (ILP) kam dei ka atiar ban khang lad ia ka jingwang rung ki briew nabar sha kane ka jylla khamtam ki nongbylla.
“Ngi la don ki ain kum ka Land Transfer Act ban tehlakam ia ki briew ba wan sha kane ka jylla.Kane lah ban leh lyngba ka jingiakren bad ka jingiathir halor ki ain ba la don lypa ban pynkhlain ia ki”, la ong u Myntri Rangbah ka jylla.
“Ka jylla Meghalaya la tip kum ka jylla kaba kiew bha ha ka ri, to ngin ym ia pynthut ia kane ka jingkiew bad ngi dei ban iatreilang ban pynurlong ia ki jingangnud jong ki paidbah”, la ong u Mukul.
U la ong ba ki kam pynroi kim dei ban bakla lynti khnang ban wanrah ia ka roi ka par kaba sted ia ka jylla. “Man ka sngi ka long kaba donkam”, la ong u Mukul bad pyrshah jur ia ka jingkhot pakhang shnong, pakhang surok, pakhang ophis.
Ha kajuh ka por, u la ong ba ka jingpyrshang jong ka sorkar ban pynbiang ia ki kolej kahmtam ban ioh ia ka saian ka long ban pynshlur ia ki samla pule ban jied ha ka jingpule ha ka sobjek saian.
“Ngi donkam ban don la kajong ka jingpule Engineering bad ka Medical college ha ka jylla khnang ban pynmih ia ki samla ki doktor, ki enjiniar, ki professor na la ka ri”, u la ong.
Kiwei pat kiba kren ha kane ka jingialang ki long u Bah Ronie V Lyngdoh, Bah Metbah Lyngdoh, u Bah Rasor Rani nalor kiwei pat.
Lah ban kdew ba ia ka Mairang Presbyterian Science College la seng ha u snem 2006 bad ka dei tang ma ka, ka kolej kaba don ha ka jingpule ha West Khasi Hills District. Kane ka kolej ka la pyniasoh sha ka North Eastern Hill University (NEHU) katba ka Higher Secondary ha ka Meghalaya Board of School Education.