“Ka pakhang shnong HNLC, kaba khanglad ia ki samla pule”

Shillong, 18 Risaw:
Ka sorkar Jylla, ka pynpaw, ia ka jingsngewkhia kaba jur jongka, halor ka jingkhot pakhang shnong, kaba 36 kynta jong ka HNLC, ha ka 21 & 22tarik Risaw 2013, kaba dei ruh ha ki sngi jong ka jingwan jngoh jong U President ka Ri sha ka nongbah Shillong.
Ka khubor sorkar, ka ong ba ka HNLC, ka dei ka seng, kaba la khein beain, naduh ka 16tarik Naiwieng 2000 bad ka la ju kyntait ban shim bynta ha ki sngi rakhe ba kyrpang, kum ka sngi laitluid bad wat ha ki sngi jong ka jingsynshar paidbah jong ka Ri, da kaba ka ju iai khot pakhang Shnong bad la pynkynmaw, ba ka HNLC, ka la khot ruh ia ki paidbah, ba kin nym shim bynta ha ka elekshon 2013, hynrei u paidbah, ula leit ban thep vote haduh 87.97percent.
La ong shuh shuh ba ka sorkar ka shim khia shibun halor kane ka jingkhot pakhang shnong, khamtam, da ka seng, kaba la shim ba ka dei ka seng beain. La ong ruh ba kane ka pakhang shnong, ka dei kaba long pyrshah ia ki samla pule, naba kin don 2hajar ngut ki samla pule, kiba dei ban leit sha katei ka jingleh burom jong ka North Eastern Hills University (NEHU).
Ka sorkar, ka khot ka wer ia u paidbah, namarkata ba kin mih ban pdiang burom ia U President ka Ri, ban pyni ruh ba ka Jylla, kam dei shuh kaba lah ban khanglad da kino kino ki buit pyntieng kohtympan, ong ka kyrwoh na U Under Secretery, Political Department jong ka sorkar Meghalaya.