“Ka Ordinance dei u Seiñ Puh ia ka Jaitbynriew, bad ka ain Bei-riti”

Shillong, 11 Nailar:
Kham mynshuwa ka HYC ka la dawa na u myntri ba peit ia ki kam ka sorkar jylla u bah Rowell Lyngdoh ba ka sorkar ka dei ban weng noh ia ka ain Ordinance 2015 ne ka Meghalaya Local Administration (Empowerment of Traditional Institutions, Traditional Bodies and Headmen in Governance and Public Delivery System) Ordinance 2015 bad ha katei ka jingiakynduh ka la ai por shi taiew ka ban kut noh ha ka 14 tarik u nailar. Hynrei na ka jingiakren bad u myntri katei ka tnad katei ka seng ka la ong ba ka la pyni shai ba ka sorkar kan ym weng shuh ia katei ka ain kaba u myntri u la ong ba ka shong ha ka ing Dorbar thaw-ain ka jylla.
Dei hadien ba la ioh jingtip lypa kaba shai ba ka sorkar kam lah ban weng noh ia katei ka ain tad haduh ban da long dorbar, u General Secretary katei ka seng u bah Robert Kharjahrin u la ong ba ka HYC da ki jingiakhih ba jai jai shuwa ban pynbor ia ka sorkar ba ka dei ban pyndam noh ia ka Ordinance. Katei ka jingiakhih u la ong ba kan sdang mynta ka sngi da ka jingsam kot lyngkdop ia ki paidbah bad ha ka kot lyngkdop la pynshai kaei kata ka Ordinance namarba haduh mynta mynne u paidbah u tip tang ia ka kyrteng ka Ordinance hynrei don aiu pat shapoh um ioh jingtip kaba shai. Ia katei ka jingsam kot lyngkdop kaba katei ka seng ka la shon haduh 50 hajar kopi ki nongialam ka HYC ki la sdang ban sam na Secretariat, nangta sha KHADC bad ter ter sha ki jaka paidbah bad ka la buh thong ban pyndep ia katei ka jingsam ia ki 50 hajar kopi hapoh ka ar taiew.
U bah Nickson Dohling, uwei na ki nongialam katei ka seng haba kren sha ki nongthohkhubor mynta ka sngi u la ong ba kawei pat ka sienjam iakhih ba katei ka seng ka la shim ka dei da kaba pynlong da ka jingialang paidbah ha ka 14 tarik mynta u bnai ha Motphran, Stand Jaiaw naduh ka por 12 baje mynsngi, bad ha katei ka jingialang ruh yn pynshai paidbah ia ka Ordinance 2015.
U bah Robert Kharjahrin , General Secretary ka HYC Central Body haba kren sha ki nongthohkhubor u la ong ba ka Ordinance 2015 ka dei u Sein puh ia ka jaitbynriew bad ka dei ruh ka ain Bei-Riti bad ka ain Beiman, “Ka dei u Seinpuh ia ka Jaitbynriew, ka dei ka ain bei-riti ( Anti Custom)” ong u bah Robert. Shuh shuh utei u nongialam ka HYC u la ong ba ha katei ka ain ka sorkar ka tuklar lut ia ki kam ki jam ka District Council , “Kam shym la tuklar ia ki kam jong u CEM ne EM, hynrei ka la tuklar ia ka hok longdoh longsnam jong ngi bad ka 6th Schedule” u la ong biang.
U la ong ruh ba katei ka ain ka pyniap noh ia ki ain jong ki Hima ne ki Elaka, kam ithuh shuh ia ka bor ki Rangbah Shnong, ym donkam shuh ia ki Rangbah Shnong ban ioh Sanad na ki bor bahalor jong ki bad ha katei ka ain la ithuh ruh ia ki Rangbah Shnong ki bym dei ki Khasi ruh tangba la jied da ka kynhun ki paidbah.
Ha katei ka ain u la ong ruh ba la ai bor ia ka sorkar jylla ban thaw shnong, “Mynta ki la don katto katne kita ki Panchayat kiba la shna hi dano re dano bad lada jia ba ki don jingiadei bad ka sorkar khlem pep yn ithuh noh ia ka kum ka bor shnong” ong biang u bah Robert. Shuh shuh u la ong ba katei ka ain ka la batai ba u Rangbah Shnong u hap ban ai syrnod jaka shong jaka sah ia uno uno u nongshong shnong , bad hangtei u la ong bay m shym la batai ia uba kumno u nongshong shnong uba la sah katno snem, hynrei la ong beit ba u Rangbah Shnong u dei ban ai syrnod beit bad lada um ai hapoh 5 sngi un shah khot hajir, “Ngim tip la u mynder uba wan ban shong tang shisngi ar sngi ruh un ioh syrnod, lada shah summon ki Rangbah Shnong namar ba ym ai syrnod hapoh 5 sngi kan long ka jinglehrain kaba khraw” u la ong.
Kaba kham ma u bah Robert u la ong ba katei ka ain ka kdew ruh ba ia ki NOC ne syrnod jaka shong jaka sah kynthup ka laisen khaii lah ban ai tang da u Rangbah Shnong khlem ka jingtip ka Dorbar Shnong ym shuh kum mynshuwa ba hap ban ioh jingmynjur na ka Dorbar Shnong. Ka HYC ka la byrngem ba lada jia ba ka sorkar kam pynduh pyndam noh ia katei ka ain kan nang iai pynbna ia ki jingiakhih jong ka.