Ka Orchid Lake Resort Umiam, ka MeECL SS kum ki Containment Zone, kawei ka iing ha Nartap kum ka Micro Containment Zone

Nongpoh: Ka District Magistrate, Ri Bhoi District, ka la pyntip paidbah ba ka Orchid Lake Resort Umiam bad ka MeECL Secondary School, Umiam, la pynbna ia ki kum ki Containment Zone ne ki jaka kiba ym long ban rung ban mih, kata kaba la treikam naduh ka 26 tarik u Iaiong haduh ka 1 tarik u Jymmang.

Ka nongrim kaba la pynlong ia ka DM Ri Bhoi ban pynbna ba kitei ki artylli ki jaka ki la shah pynhap kum ki Containment Zone, ka dei hadien ba la don ki briew na kitei ki jaka, kiba la shah ktah ha ka khlam Covid-19. Ha kitei ki jaka kiba la shah pynhap kum ki Containment Zone, la khang pyrshah ia ki briew ba ki rung kin mih bad lada don kino kino kiba leh pyrshah, kin sa shah pynshitom katkum ki kyndon Ain.

Ha kajuh ruh ka por, ka DM Ri Bhoi District, ka la pyntip paidbah ba kawei ka iing kaba don ha shnong Nartap, ka la shah pynhap ha ka thup Micro-Containment Zone, kaba sdang naduh ka 27 tarik haduh ka 2 tarik u Jymmang mynta u snem, la pynhap Micro Containment Zone ia katei ka iing, ka dei hadien, ba la lap ba uwei u briew na katei ka iing u la shah ktah ha ka khlam Covid-19, namarkata na ka bynta ban iada na kaba saphriang shawei pat, la pynhap noh ia katei ka iing ha ka thup Micro-Containment Zone.