KA ORAL CANCER: KI DAK JINGSHITOM BAD KI LAD JINGSUMAR IAKANE KA JINGPANG

Kong Linda Kongwang

Ka Oral Cancer kadei kaba ju khot ruh ka mouth Cancer ne ka jingpang bampong ha ka shyntur. Kane ka jaid jingpang kaba pur stet bha haka shyntur na ka daw ka jingsan ki Cancer cells kiba hiarthma bad pynsniew iaki tissues ha baroh sawdong ka shyntur. Kane ka Oral Cancer ka mih paw kum ka jingmih ki tohjaw, ki jingmong, ki jingat ne ki prum hapoh jongka shyntur kiba ymlah ban pynkoit kloi ia ki.

Kine ki jaid bampong ki don bunjait kynthup iaka bampong haki rymmiang shyntur, ha u thylliej, haka ngab, ha syndah shyntur, u sinuses bad ha u tangkro. Kine ki buh jingma shibun iaka jingim lada ym sumar ha kapor kaba biang.

KAEI KABA PYNLONG IAKA ORAL CANCER.

1. Katkum ka jingwadbniah da kiba bun ki riew shemphang ha satlak ka pyrthei, ki shem ba dei u duma bad ki jingbam jingdih kiba la shna na u duma kiba pynlong ia kane ka jingpang bampong (oral cancer). U duma ne sikret kidei ki nongshun ba hakhmat eh ia kito kiba ju mlien ban pyndonkam iaki kaba ialam shaka jingshahktah jongka jingpang bampong haka shyntur.
2. Ka jingpyndonkam palat iaki kynja musli musla haki jingbam ba manla ka sngi ruh ka pynsniew iaki bynta ba hapoh ka shyntur kaba wallam iaka jinglong prum ka shyntur.
3. Ka jingshah palat ka durkhmat bad ka rymmiang shyntur haki UV Ray’s jongka sngi.
4. Ka jinghiar pateng na kiba ha iing hasem kiba la shahktah lypa na kane ka jingpang.
5. Ka jingpyndonkam palat iaki dawai kynruh shyntur (mouth wash) kiba don alcohol haki.
6. Ka jingshahktah naki khniang jingpang hapoh shyntur (infection) daka Human Papillomavirus (HPV).
   KI DAK JINGSHITOM JONGKA JINGPANG ORAL CANCER.
7. Ka jingthoh lieh, saw ne khlehlang haka shyntur:— Katkum ka jingwadbniah daki riew shemphang shaphang ki dak jingshitom haka shyntur, ki shem ba ka oral Cancer ka kham shimpor ban san bad paw dak haka shyntur bad ha u tangkro haba ianujor bad kiwei pat ki jaid bampong kiba ktah iaka met. Ki dak ba paw kloi tam jongka jingdon is kane ka jingpang kadei ka jingpaw jongka jingthoh lieh saw ne khlehlang haka shyntur. Kine ki pawbha Kim ki jingat ki barit barit kiba long sohkhruh kiba wallam ka jingsuh tyrha kaba jur kaba ymlah ban pynkoit kloi. Kine ki jingat kidon lai jaid katkum ka rong ba ki mih paw bad kita kilong:–
   Ka Leukoplakia — ki jingthoh lieh. Ka Erithroplakia — ki jingthoh saw.
   Ka Erithroleukoplakia — ki jingthoh khlehlang kiba saw bad lieh.
   Lyngba ka jingdon kine ki jait jingat kiba thoh lieh saw ne khlehlang ha shyntur lah ruh ban ithuh da kaba pyndonkam daki jain jem kiba jhieh bad pyrshang ban niad bad pynkhuid iaki. Lada kine ki jingat barit ki khoh da kaba suk, kamut phim don iakane ka jingpang oral cancer, hynrei lada kine ki jingat kim khoh bad phi ioh iakane ka jingshitom fungal infection (Candidiasis), te phi donkam ban leit pyni wut wut haki doktor kiba iadei bad kane ka jingshitom ban leh ia kaba donkam naka bynta ka jingkoit jingkhiah jongka shyntur jongphi.
8. Ki prum kiba mih bad bymkoit ha shyntur bad rymmiang shyntur:— Kine kidei sa kiwei pat ki dak jingshitom kiba paw bha jongka oral cancer. Ka jingdon kine ki prum hapoh shyntur bad haki rymmiang shyntur kiba ym jem wat hadien ka jingsumar kaba katto katne bnai ruh, ka kdew shai beit beit jongka jingsdang kane ka oral cancer.
9. Ka jingnangsan ki jingat hapoh shyntur:— Kham bunsien phin iohi kine ki jingat ki ju jia ha syndah jongu thylliej, haki ngab, haki bynta ba shadien jongka shyntur bad haki rymmiang shyntur. Hynrei kane ka oral Cancer kalah ruh ban ktah ha kino kino ki bynta jongka shyntur wat haki dohbniat, ne ki bynta ba shapoh u thylliej ruh. Te haba phi lap ne shem ia kum kine ki jingat kiba mih haka shyntur jongphi, Kan bha eh ban leit pyni kloi haki doktor naka bynta ki lad jingsumar.
10. Ka jingat ha u ryndang :— Ka jingpawdak jongka jingat kaba eh ha u ryndang kalah ruh ban dei ka dak jongka jingpang oral Cancer. Haka jingsdang (stage) ki bynta ba shakhmat jong kane ka jingpang oral cancer, ki cancer cells ki iaid lyngba ka lymphatic fluid kiba lang haki lymph node kiba don ha u tmoh bad baroh arliang u ryndang. Ha ki lymph node, kine ki cell cancer ki sdang ban heh bad san kaba ialam shaka jingmihpaw ki dak jingat ha u ryndang.
11. Shem jingeh ban nguid iaki jingbam:— Manla kapor,ngi ju ioh ban bam suk iaki jingbam khlem kino kino ki jingeh kiba wan pynthut ha kapor ba ktha bad nguid iaki jingbam. Ho’oid teng teng ngi mad iaki jingeh haba pyrshang ban bam shibun ki jingbam. Kine ki jingeh ki wan jia tengkhat bad ki jah noh, hynrei lada ki neh slem bad phi mad jingeh manla kapor haba bam ne nguid iaki jingbam, la lah ban dei ka dak jongka jingpang oral cancer.
12. Ka jinghiar kynsan ka jingkhia :— Kawei naki dak bapaw kloi haba shahktah na kino kino ki jingpang bampong (cancer) kadei ka jinghiar ka jingkhia jongka met bad ka jinghiar ka jingkhia ka shim ruh iaka bynta halor ka jingioh iaka bampong haka shyntur. Ka jingbymlah ban bam bad nguid bha iaki jingbam haba thngan kalah ban ialam sha ka jingraikhoh kynsan kynsan.
13. Ka jingset ryndang:— Ka jingset khah khah u ryndang ruh kadon jingiadei bad ki thied kiba set bad pynthut iaka sur jongphi bad kane kampong kaba bha naka bynta jongphi. Lada la jingset ryndang ka neh slem kumba katto katne bnai kalah ban dei ka jingshitom threat cancer.
14. Ka jingpang haki shkor:— Kane kalah ban dei kawei naki jait jingshitom kiba ngi ju leh klet ban sumar. Ka jingneh slem ka jingshitom hapoh shkor kalah ban dei naka jingsan ki cell cancer kiba ksam shapoh ka met kynthup shaki thied kiba pynlong iaka oral cancer.
    KIEI KI LAD JINGSUMAR IAKA ORAL CANCER.
    Ka jingsumar iaka oral cancer kalah ban iapher na kiwei ki jait bampong ha ka shyntur sha kiwei pat bad katkum ki stage ba phi don iakane ka jingpang. Katba ka jingsumar thik ia kane ka jingpang ka shong eh haka kyrdan jongka cancer kaba phi don, ka jaka kaba kane ka jingpang ka don, ha shyntur ne ha u tangkro. Ki jingsumar kiba ju sumar naka bynta ka Oral Cancer kilong kine harum:—
15. Da kaba puid:— Ka jingluit iaki bynta ba doh ka bampong kalong kaba donkam eh naka bynta ban went ia baroh ki tumor kynthuplang ia ki katto katne ki tissues kiba koit ba khiah bad ki lymph node ban iada naka jingshahktah biang nakane ka jingpang.
16. Ka jingpyndonkam daka radiation iaka khlieh bad ryndang:— Ka jingsumar daka radiation ka dei sa kawei pat ka lad jingsumar kaba biangtam. Borabor ki doktor ki ju ai jingmut ban leh shisien ne arsien shisngi haka shitaiew nala bynta 2-8 taiew.
17. Ka chemotherapy:— Kane ka jaid jingsumar la ju sumar bad ki kynja dawai(drugs) kiba lah ban pyniap iaki cancer cells. Kine ki jaid dawai la ju ai iaki nongpang lyngba ka intravenous (IV) line.
18. Bam iaki jingbam tei met:— Ki jingbam tei met ruh ki shim iaka bynta ba kongsan ban sumar iakane ka jingpang. Bun ki rukom ai jingsumar ki buh jingeh ban bam bad nguid iaki jingbam. Nakata kadaw pynthikna ban iakren bad ki doktor ne ki dietician naka bynta ki jingbam kiba phi donkam ban bam. Khublei.