Kong Linda Kongwang
Ka jingwan ka khlam Covid-19 kala pynkylla shisha iaka pyrthei hi baroh kawei bad ka jingkylla haka rukom pule ruh kadei kaei kaei kaba baroh ki ri ka pyrthei ki khuslai bad ka jingthawlad naka bynta kine ka dang iaid shait shait daka jingsdang lyngba ki online class ne ki online training. Ka jingpule haki online kam da donkam eh mynshuwa kumba ki donkam mynta namar ka jingwan ka khlam Covid-19. Ka jingpule haki online kalah ban neh katto katne bnai ne katto katne snem katba ympat lah ban pynduh pyndam iakane ka khlam.
Ka jingsdang ban pyndonkam iaka online training kala nangkiew ha kine ki por bad kine ki ai jingmyntoi shibun iaki khynnah pule, hynrei hapdeng kine, bun ki khynnah ki iakynduh jingeh ban sdang iaka online naka bynta ka pule puthi. Hangne ka jingthoh ka pyni ba kidon katto katne ki jingeh kiba ki khynnah skul ki iakynduh haba pyrshang ban pule haki online bad kumno ban weng iakine ki jingeh.
KA JINGIAKYNDUH JINGEH HAKA LIANG KA INTERNET:— Hapdeng kine ki por ka jingpule haki online kalong kaba kongsan namar ki ai jingmyntoi shibun iaki khynnah pule, hynrei kine ki jingmyntoi ki duh noh lada ka internet kam biang. Bun ki jaka ne ki shnong khamtam kiba don ha nongkyndong ki mad jingeh ha kaba iadei bad ka online class namar ka jingthut khah khah jong ka internet. Hangne phim dei ban khuslai, ban pynbeit iakine, ki kmie ki kpa kilah ban iakren bad ki nonghikai ne ki bor skul ban ai haki khynnah iaki jingleh kiba ju leh ha iing kiba ym donkam internet. Ki kmie ki kpa kilah ruh ban kyrpad iaki jingthoh bad ki jingbatai kiba ladep rekod naka bynta ki jingpule khnang ba ki khynnah skul kilah ban pule bad thoh khlem da pyndonkam iaka internet bad kana ka kyntiew ruh iaka jingpynleit jingmut jongki haki kynta ba ai jinghikai.
KA ONLINE CLASS KAM LONG SNGEWTYNNAD:— Wat la kine ki jingshah hikai haki online ka thmu ban pynioh lut iaki jinghikai baroh kumba ju long hapoh klas hynrei kane kam long kumjuh. Bun ki jingpule ki kynthup haki iaki jingthoh kiba jrong kiba ymdon jingkut shuh bud sa ki jingthoh kiba lyngkot kiba pynthait kloi bad pynshoh samthiah kloi iaki khynnah khamtam haba peit sah haki mobile ne ki computer. Ka jingthait kloi naka daw jongka jingbym sngewthuh haduh katno donkam ban thoh ka ialam shaka jingbymkwah ban pule bad ban ai mynsiem haki jingpule kaba dei ka daw bah ban duh jingkyrmen haki online class. Ban pynduh iakine ki jingeh, ki kmie ki kpa ki donkam ban iakren bad ki nonghikai shaphang ki jingthoh kiba ki khynnah ki donkam ban leh ha iing bad ban sngewthuh haduh katno ki donkam ban pule bad sngewthuh ia kaei ki donkam ban leh. Bun ki khynnah ki shem jingeh ha kaba sdang hynrei suki suki ynda haba kila pyrshang ban pule man ka sngi kan pynsuk haba pule bad sngewthuh iaki rukom leh haki online.
KA JINGBYMNANG BAN PYNDONKAM BHA IAKI TECHNIQUE:— Bun ki khynnah kim nang ban pyndonkam bha iaki mobile ne ki computer bad kane kadei ka daw ha kaba bun naki online class ne ki online training ki duh bad jah noh. Ki don shibun ki jingeh kiba ki khynnah ki ju iakynduh haba pyndonkam iaki mobile ne computer namar ka jingbym sngewthuh iaki technique kiba dei ban pyndonkam bad ki jinghikai ki shu sahkut noh namar ki khynnah skul kim nang ban bteng biang iaki. Baroh kine ki wanrah jingdom bad sngewthait bad kane ka ialam sha ka jingduna ban pyndonkam iaki online course bad ki jingpule ne ki jingthoh ki thut noh bad khlem pep ki khynnah kin sangeh iaki jingpule shiteng por. Haba iakynduh ia kum kine ki jingeh phim dei ban khuslai, ki kmie ki kpa ki donkam bad twad jingmut na ki bahaiing hasem ne nakito kiba kham nang shaphang ki teknoloji lane ban leit iakynduh iaki nonghikai ban wad jingiarap na ka bynta ki technical issues. Hikai ban nang kumno ban pyndonkam iaki browsers ne kiwei pat ki operating system khnang ban pynsuk iaki jingpule ha ki online class. Ki khynnah kilah ruh ban twad jingmut para khynnah skul shaphang technical issues haka por online. Lada phi lah ban leh kumne, phin ym shem jingeh ha kino kino ki technique kiba phi donkam ban tip bad pule.
KA JINGBYMTIP LANO KI JINGPULE KIN KUT:— Ka juh jia haba phi la pynkhreh da ki bnai naka bynta ki jingpule haki online hynrei phim tip pat lano kin kut bad kine ki buh jingeh shisha haba ymtip bniah. Ki khynnah pule kidon daki spah bad da ki hajar ki lynnong ban pule ha baroh ki sobjek bad lada kim tipbniah shaphang ka jingsdang bad ka jingpynkut jongki jingpule, khatduh kin ym sngewthuh bad kin ym shimkhia ban pyndep iaki. Hangne ruh phim donkam ban khuslai, haba don ki jingkylli ki jubab ruh ki don. Ki nonghikai ki donkam ban shimkhia na ka bynta kine ban batai lypa iaki khynnah katno donkam ban pule bad thoh bad lada phi kwah ba ki khynnah kin sngewthuh bha, pynlong Dali online campaign bad ai katto katne ki assignment ba kin leh hi. Kine kin iarap iaki ban long ki khynnah kiba tbit bad shemphang.
KA JINGBYM SHIMKHIA IAKA POR :— Ka jingpule haki online ka ailad iaki khynnah ban jied hala kajong ka por bad ha kano ka jaka baki sngewtynnad ban pule. Ki iohlad da kaba suk ban pule dalade khlem da don kiba peit ne khmied iaki, hynrei ka jingiohlad ban pule hi dalade khlem da don ki ba peit ba khmied bunsien ki ialam sha kiwei pat ki kam kiba pynbyrngia bad ka jingbyrngia palat ha kiwei ki kam ka khate noh iaka por bad kim donpor shuh ban pynleit jingmut haki jingpule. Ban ialeh iakine ki jingeh ki khynnah ki donkam ban ia bynta iaka por pule bad ka por ialehkai. Buh ryntih iaka por kaba biang ba kin sdang ban pule ha ka juh ka por lyngba ki video call ne haki online training. Ka jingbuh ka por kaba biang ban pule ksn iarapniaki khynnah ban sngewthuh iaka jingkordor ka por bad ka jingdonkam ban pule bha.
DEI BAN DON KI NONGPEIT IAKI KHYNNAH HABA LEH ONLINE CLASS:—- Ka jingpule haki online ka ai jingmyntoi shibun hynrei phi donkam ruh ban kynmaw ban ym leh palat pud. Ki khynnah teng teng ki jlep bad ngiah ban pule haba ymdon kiba peit ne khmied iaki haba ki pule haki online. Ka jingbymlah ki nonghikai ban donlang hajan ban batai shaphang ki jingai jingtip, bunsien hi ka pynduh jingkyrmen bad ki donkam iakiwei pat ban donlang hajan ban ai jingtip haba ki donkam. Ha kum kine ki por, ki kmie ki kpa ki dei ban shim iaka jingkitkhlieh ban donlang bad ki ban iarap haba ki donkam. Da kaba leh kumne kan iarap iaki ban nang pynleit jingmut haki jingpule bad kin sngewthuh shuh shuh iaka rukom pyndonkam iaki jingpule ha ki online. Khublei.
Phi don ban ong eiei?