Ka One Election one Nation,kaba bha palat ha ka Ri, ong u bah A L Hek

Shillong:U Nongïalam ka BJP bad u Myntri Sorkar u Bah A.L. Hek ula pynksan ba ka jingtyrwa “One Nation, One Election” jong ka Sorkar Pdeng ka dei ka ban ai jingmyntoi bha sha ka roi ka par jong ki Jylla bad ka Ri.

Une u nong ïalam ka BJP ula ong, ka Ri India kala dei lypa kawei ka Ri (one nation) bad kawei ka ilekshon hapoh ka Ri ka dei kaba bha palat.
Katkum ka jingong jong u, “Ki don bun tylli ki Jylla hapoh ka Ri India bad ha ka shisnem, ngi don lai-saw tylli ki ilekshon. Ngi don ki ilekshon Assembly, ilekshon MP, ilekshon Panchayat, ilekshon MDC”.

“Lada kawei ka Jylla ka don ilekshon, la treikam ka Model Code of Conduct kaba khang ïa ka jingïaid ki kam pynroi. Kawei hadien kawei, katno shuh ki MCC kin khang ïa ka jingïaid ki kam pynroi,” ula bynrap.
U Bah Hek ula kdew ruh ba lada phai sha ka jinglut jingsep, “Ka pisa kaba bun bah la pynlut ha man ka por ba pynlong ïa ki ilekshon, nalor ki bor pahara bad ka por jong ki Nongïalam ruh la shu lut tang ha ka ilekshon,” ula bynrap.

Ula ong, “Da dei ba don noh tang kawei ka ilekshon, kato ka jinglut jingsep ba pynlut man la ki ilekshon la lah ban pyndonkam noh sha ki kam pynroi jong ki Jylla bad ka Ri India baroh kawei”.
Ula ong, “Ka One Nation, One Election,” ka dei kaba bha bad ka ban pynmyntoi bha.