Ka jaka buh ia ki khynnah shynrang ba hapoh 18 snem ne ka Observation Home (Juvenile) ka don hapdeng ka jing long kaba ijot bha. U nongthoh khubor u la ioh ban iaid lynti ha kane ka sngi Palei ha katei ka thain, u la iohi da ki khmat ba ia kane ka jaka kaba don ha Cleve Colony kaba don ha syndah ka Mizoram House, la shu ker da ka tin (CGI sheet).
Kane ka iing kaba la shu shim shong wai na u Bah Shro Marbaniang (bam kwai ha duwar u Blei), ka la irim bha kaba shna da ka iing dieng bad tap da ka tin.
Namar ka jingbym biang ka jingker, la ioh jingtip ba la don ki khep ba ki khynnah ba set ha katei ka jaka, ki lait phet.
Dang shen, ki pulit ki la ioh FIR na ka bor pyniaid jong kane ka Juvenile Home hadien ba ar ngut ki khynnah ki la lait phet. Hynrei uwei na ki, la ioh bat biang na thain Jaintia Hills, katba uwei pat ba na thain Nongstoin ym pat ioh kem haduh mynta naduh ba la lait phet.Ka jinglaitphet jong kitei ki khynnah ka dei lehse namar ka jingbym biang ka jingker, namar ba la shu ker da ka tin kumto.
Na jrong iing jong ki briew, lah ban iohi synna ia kane ka jaka buh ia ki khynnah bad ka long ka jaka bym don shuh ka jinglong kyrpang ne privacy.
Najrong iin briew, haba peit ia kane ka jaka, la iohi ba ka phyllaw ka dei da ka khyndew khlem pat siang dewbilat. Kane ka jaka ka heh kumba 3580 sq ft.
Ha kane ka jaka, kaba shu shong wai, ka ngiam ban buh haduh 40 ngut ki khynnah ba hapoh 18 snem hynrei don ki por ba la palat bad don kiba duna ruh.
Namar ka jingbym don ka iing lajong, ka sorkar ka la hap pynlut T. 25 hajar man u bnai ban siew bai iing bad mynta la ioh jingtip ba ka la pynkhreh ban shna sha Mawdiangdiang ha ka jingheh kaban long haduh 3 akar.
La dep mang tyngka ia kane ka Juvenile Home ha Mawdiangdiang ha ka dor kaba T. 2.79 klur bad mynta yn khot tender noh ban sdang ia ia ka kam bad la buh thong ban pyndep ia kane ka iing kaban biang nadoh shadong ki jingdonkam hapoh san snem.
La iathuh ba mynta kane ka tnad ka la don la kajong ka Juvenile Justice Board kaba pynlong ia ka jingbishar man ka taiew ia kitei ki khynnah ha katei ka jaka hi. Ia kane ka Board la khlieh da u Principal Magistrate, bad ar ngut ki dkhot bad ki ju pynlong ia ka jingbishar ia ki kes (case) hangtei man ka taiew.
Katkum ka kyndon, ia kano kano kes dei ban pyndep baroh hapoh saw bnai lait noh tang kito kiba dei ki kam runar ba pyniap briew ne kiba heh. Ki khynnah kim dei ban sah palat ia ka saw bnai katkum ka ain, bad ym tang katta, ki jingtohkit ruh dei ban pyndep lut shwa ka saw bnai.
Phi don ban ong eiei?