Nongpoh: Ki Nongmihkhmat ka Nongpoh, kiba kynthup ia u Bah Mayrald Born Syiem, MLA ha ryngkat u Bah Balajied Rani, MDC, hynnin ka sngi ki la leit ban kynduh bad buh ruh da ka Dorkhas ia u Conrad K. Sangma, Myntri Rangbah ka sorkar jylla, kata na ka bynta ban pynpaw ia u halor ka jingdawa jong ki ban pynurlong noh ia ka Umden C&RD Block.
Haba leit ban kynduh ia u Myntri Rangbah, kitei ki Nongmihkhmat ka Nongpoh, ki la pynpaw ba ka thain Umden, kaba la kdup ia shibun tylli ki shnong, ka la deihok ban ithuh noh ne ban ioh noh ia ka C&RD Block. Nalorkata ki la iai ban halor ka jingdonkam ia katei ka thain ba kin iohi noh ia ka surok ba bha, kaba la pyniasoh na Nongpoh-Umden shaduh Sunapur.
Halor kitei ki mat kaba la leit pynsngew da kitei ki Nongmihkhmat ka Nongpoh, haba iadei bad ka Umden C&RD Block, ka jubab na u Myntri Rangbah ka long ba u la ong ba un sa bishar bniah, la katei ka thain ka la deihok ne em ban ioh ia ka C&RD Block. Katba haba iadei bad ka surok na Nongpoh-Umden sha Sunapur, u Myntri Rangbah ka sorkar jylla, u la jubab ba kan sa urlong noh shen.
Ka nongrim kaba la pynlong ia ki Nongmihkhmat ka Nongpoh, ban dawa na ka sorkar ba ka dei ban pynurlong ia ka C&RD Block ha Umden, ka dei namar ba katei ka thain, ka dei kaba la heh bad da ki spah tylli ki shnong na katei ka thain, ki la hap ban shanniah ia ka Umling C&RD Block, kaba dei ka C&RD Block, kaba la heh bha bad kaba la hap ban kdup ia kiba bun tylli ki shnong haduh 226 tylli ki shnong bad palat 11500 ki longïing bad ka jingbun paid ka la kot sha ka 81,000 ngut bad dei halor kata ka nongrim, kaba la pynlong ia ki Nongmihkhmat ka Nongpoh, ba kin dawa na ka sorkar ba dei ba don noh sa kawei ka C&RD Block ha Umden.
Phi don ban ong eiei?