Ka NPP kan kyrshan naduh tyllong dohnud ia ka UDP, ong u bah Prestone

Shillong: U nongialam ka NPP u bah Prestone Tynsong u la ong ba ka NPP ka la sngew dei ban kyrshan ia u kyrtong ka UDP ha kane ka elekshon shiteng samoi kaban long ha Shella konstitwensi ha ka 21 tarik Risaw.
Haba kylli hato ka NPP kan kyrshan naduh ka mynsiem ne tang na sla ktien, u bah Prestone u la ong, “Naduh ka tynrai u dohnud (From the bottom of my heart)”.
U la ong ba ka NPP ha kane ka kynti kan kyrshan ia ka UDP hynrei ia ka jingrai ka PDF, BJP ban iakhun watla ki dei ki paralok ha kane ka sorkar MDA, ym lah ban ong eiei namar ba ki don la kajong ka rukom pyrkhat bad ka rukom pyniaid kam.
“Ngin kyrshan ia u kyrtong ka UDP bad ngin leit ruh ban ialap elekshon baroh ki nongialam ka NPP”, la ong u bah Prestone.
Hynrei ha kajuh ka por, u la ong ba watla kiwei ki paralok ka MDA ki iamih madan ha kane ka elekshon hynrei ka sorkar MDA kam don eiei ban khih bad ka skhem beit triang.