Shillong:Ka Khun Hynniewtrep National Awakening Movement (KHNAM) ha ka 4 Tarik Kyllalyngkot 2025, ka la lum ia ka jingialang bad ki kyrtong MDC ki ban aireng ha ka MDC election na ka bynta ka Khasi Hills Autonomous District Council (KHADC) ha ka jingialang ba la long ha Shillong Club.
Kine ki kyrtong ki ba kynthup ia u Working president ka KHNAM u bah Thomas Passah u ban ia khun na Jaiaw, u Bah Joseph H Pyngrope na Sohryngkham u Bah Pynshai Mawrie na Mawkynrew, u Bah Banplieborlang Mawroh na Langkyrdem-Laitkroh, u Bah Peter Challam na Laitumkhrah-Malki, u Bah Raymond Basaiwmoit na Mawkhar Pynthorumkhrah, u Bah lasuklang War na Shella bad u Bah Baristar Poul Thyrniang na Mawkyrwat.
Haba kren sha ki lad pathai khubor u bah Thomas Passah u la ong, ba kane ka jingialang ka long ban ia kren sani bha halor ka jinglong jingman ha ka synshar khadar ha District Council.
“Ka District Council mynta ka la long kum ka jingialeh kai namar ka don ka don ka party, kaba shu ap thap ban thied ia ki ‘Ready Made MDC, kumta Ki paidbah ki dei ban husiar bha ia ka NPP namar kan ap thap da ki MDC kiba la jop na kawei ka party bad ban shu thied ia ki khang ban wan ha ka bor”.
U bah Passah u la ong ba ka KHNAM ka la pynlong khnang ia kane ka jingialang ban pynskhem ia ki kyrtong halor ka mynsiem ban iatiplang bad ban bat ia ka kular ba haba la jop na ka seng ym dei ban shet kylla ia ka seng bad dei ban iaid neh.
Nalor kane, u bah Passah u la kren shai ruh ba ka KHNAM kan ym treh ban ia trei lang bad ka NPP ne BJP hapoh KHADC, da kaba kdew ba namar ka KHNAM ka la iohi lypa ia ka rukom treikam jong ka NPP bad ka BJP bad ruh ba lada kiwei ki party ki kwah ban iatreilang bad ka KHNAM kin hap ban pdiang lut ia ka mat trei kam jong ka Seng.
Phi don ban ong eiei?