S.K.N
[ba bteng]“Peit Shane nga ialam khnang ia phi sha kper namar ngam sngew nud ban ia khana bad phi ha iing ia kito ki kam kiba ngi iakren mynshuwa. Mynta ka la urlong tangba ka jingeh jong nga pat ka long ba ngam lah ban leh ei ei imat namar u pyrsa u sian palat kum u myrsiang” la pynpaw u Maheh
“Maheh, phim dei ho ban iaid lait na ka jingiakren mynshuwa, namar kato ka la long kum ka kular ba ngi iateh. Phi tip nga naduh ba iohsngew ba ka khun jong phi ka lah ia poi bad u khun jong u Bah Shanbor katno nga la kmen, namar nga sngewthuh ba ka jingpyrkhat jong nga bad phi ka la treikam” la pynpaw u Bah Lait.
“Hooid nga la sngewthuh, Bah Lait tangba nga la ong ha phi ba ka eh pat ia nga mynta” la ong biang u Maheh
Khatduh u Bah Lait u shu ong
“Peit mo Maheh, nga te ngan ym riej lada phim pyndep ia ka kular” la maham u Bah Lait
Marsien iohsngew ia kata ka ktien, kiew jingkhluit u Maheh lain bad u shu ong,
“Phi tharai nga ruh ngan riej ia phi..”
Bran nangta ki mih na kper da ka jingiadom bad ki la ia pyneh nia iwei ia iwei pat markylliang.
I Kmie ka Lydia iba la nang iohsngew malu mala ia ka jingheh nia, i la sngew pher bad i la shu peit tuh na jngai. I iohi ba u Bah Lait u la mih bran da ka jingdom bad kumjuh u Kpa ka Lydia da ka jingiapyneh nia. Hynrei i khlem kwah ban kynjoh ktien eiei.
Ynda la rung u Kpa ha iing, i la shu kylli
“Balei phi ia heh nia heh ktien kumto Kpa?”
Shiphang u Maheh um nang jubab u la shu sngap bad shong beit kum u bym iohsngew.
“Sha Kpa iathuh kein…” la ban ktien biang i Men Kmie
“Ngam tip shuh Kmie uto u la dom ia nga nga ruh nga la dom ia u…” ong u Kpa
“Kaei phi ia dom, ngam sngewthuh nga …” la kwah tip ka Kmie.
“Tip uto u shu khyllie ia kaei kaei ka bym lah long, u sdang ban kynroi ruh ia nga ta ka daw nga la sngew dom ia u..” la phai ktien u Maheh.
Ka Kmie mynta ka la sma ba don kaei re kaei kaba ki ia kular mynshuwa namar u Kpa ka Lydia bad u Bah Let mynba u dang long Rangbah Shnong ki iadei jingmut bha. Ka kynmaw ba haduh ka kes jong ka khyndew ka Kong Lumspah ruh dei ma u uba ai kyrshan ia u Bah Let.
“Iathuh shai Kpa don kaei re kaei imat kaba phi ia kular ia suhbuit kaba phi dei ban pyndep” la kylli biang ka Kmie
Hangta u Maheh mynta u sngewthuh ba um lah buhrieh shuh namar ka rukom kren ka Kmie sngew kumba ka la dep tip. Kumta u rai kut ban sa iathuh pat ha lum haba ki ia don tang arngut hi.
“To Kmie ngin ia khreh leit lum noh, ngan sa iathuh pat ha lum..” la jubab u Kpa.
“O ym long iathuh hangne…?” la kem ktien biang ka men Kmie.
“To seh iai shah..” la kyrpad u Kpa
Kumta ka Kmie ka la pyndem noh ia lade bad ka la leh khohreh ban khreh ban khrum.
Haba la poi ha lum, ka Kmie kam nang trei nang ktah khlem da tip noh ia kata kaba u Kpa u la kular ban iathuh. Kumta hi u Kpa ruh u la iathuh baroh kiba u la kren bad u Bah Let.
“Pleng kumta mo…?” la ong ka Kmie
“Hooid, kein mynta u Bah Let u la byrngem kumto te nga ruh hab husiar ia lade…” la ong u Kpa
“Peit mo ioh phi ktah kti ia i Pyrsa te nga la ong lypa, kum une u briew uba bha uba kitkhlieh bad uba mih na ka iing ba donburom lada phi lehkai te, nga ruh ngam banse ban kyndang ia phi na iing.” la byrngem ka men Kmie.
“Em phi Kmie kito ki kular bad u Bah Let u Maheh um kynmaw shuh sah hi sa tang u Bah Let ban pyndep phi tharai nga ngan biej haduh katno eh..” u la ban ktien u Kpa.
“Hooid da kynmaw” la ong ka Kmie kumta ki sdang ban ia trei ia beng noh.
Ha kata hi kajuh ka miet katba ki dang ia shongkai, shi Kmie shi kpa shi khun bad u pyrsa kyndit la don ba wan kyndar iing da ka jingdom.
“Plie ka iing ” la don ka sur ba khot. [yn dang bteng]
Phi don ban ong eiei?