S.K.N
[ba bteng] Bran ka pynbeit la ki kjat sha iing. Lynter lynti ka sngew kumba ka poi ruma ba kan iohi ia u Hep u khun jong u Bah Shanbor.
“Uto pleng uta u Hep u khun jong u Rangbah Shnong ba i Pa i ong.. U i biang bha hi haba shu peit, tang ba tip shuh ia ka ba shapoh…” Ka la kren wei briew.
Haba ka la poi ha iing, u Kpa u la ong ia ka
“Phi slem bha du khun ..”
“Hooid kein, im shah mih te ito i Mama khlem da dihsha sa slem ” la phai ktien ka Lydia.
“Hangto te khun kiba donburom bha te.. Naduh u Kpa, ka Kmie ki khun ruh..” La ban ktien sa u Maheh
“Hooid kein imat..” Ong ka Lydia
“Nga sa ong kumto ia phi ruh ba nga tip bha bad lah juh mad kam juh rung juh mih ha iing jong ki..” La ban ktien biang sa u Kpa
“Kumta mo” la ong pat ka Lydia
Kumta ka Lydia ka sdang ban trei kam iing kam sem noh bad la ka Kmie.
“Phi wan nangno khun…?” La bniah sa ka Kmie
“Na iing i Rangbah Shnong..” La jubab ka Lydia
“Phi leit leh aiu kein…” La kylli ka Kmie
“Shu phah donkam i Pa” la jubab ka Lydia
Ka Kmie kam ong ei ei, hynrei ka shu sngap noh. Hapoh la ka jingmut ka la sngewthuhlypa ia kaei kaba u Kpa u thew ia la ka khun. Ynda ha ka por miet ha jingthiah ka sdang ban bniah na la u Tnga.
“Kpa Lydia, long phi phah leit aiu kein ia ka khun sha iing u Rangbah Shnong?” Ka ap ban ioh jubab na u
“Nga phah ong ba u Bah Bor un wan kai shane…” La jubab u Maheh
“Ban lei kein ym leit hi haba donkam …?” La phai nia ka Men Kmie
“Kwah ba un wan ma u kein…” La ong pat u Maheh
“Ni, phi te Kpa lada sha iing u Bah Let pat dang phyrngngab ruh leit hi. Sha iing u Bah Shanbor pat ym long… Balei mo..” La ong pat ka Kmie
“Sngap noh Kmie namar nga kham tip ma nga shibun…” La ong pat u Maheh
“Long phi thmu aiu kein…?” La bniah biang ka Kmie
“Thmu aiu pha ba shu tharai sniew ..” La mih ka ktien khor na u Maheh
Kumta hi haba ka Men Kmie ka sngewthuh ba u dom, ka sangeh noh hangta bad kam ong ei ei shuh. Ka miet ka la nang kynjah baroh ar ngut ki thiah noh jai khlem ia bun ktien shuh. Ha ka jingkynoi jong ka miet ki shijur ki la iohthiah kum ba iap bad ki sa kyndit tad ynda haba ka sngi ka la tyngshain bha ha ka pyrthei. Ka Lydia kaba la nang khie naduh dang saw ka tyngab, ka la dep leh lut ki kam step baroh. Hadien kata ka sa pynkhreh sha ia la u Kpa bad ka Kmie. Katba ki dang ia dihsha kumta, kumba iuh tdong bsein, la wan mih u Bah Shanbor, u Rangbah Shnong.
“Ade i Bah phi la wan…” La kren nyngkong eh u Maheh
“Hooid Maheh, nga la wan… Nangta kumno phi long..?” La kren pat sa u Rangbah Shnong.
“Ngi ia biang hi kumne… ” la phai ktien u Maheh
U Maheh u ialam ia u Rangbah Shnong sha kamra shongkai. Kumta ki ia shongkai hangta hadien shiphang por wan mih sa i lok u Maheh.
“Bah phi la wan… Sngewtynnat phi wan mih teng kumne…” i la ong
“Hooid kein, ym juh don por te phi.. Mynta ruh nga ong shuh ngan leit mih noh dang kham step ioh phi ia leit jingleit. Nga wan mih noh wut wut namar i wan mih to i khun phi mynnin bad i ong ba phi kwah ba ngan wan mih kai shane. Te nga haba don ka jingkhot nga long uba kyrkieh ban jubab noh..” La ong u Rangbah Shnong.
“O hooid, kein nga phah namar ba la slem ym juh iakynduh shuh bad phi te mo. Nga sngew kwah hi kein ba phin wan mih teng..” La phai ktien u Maheh
“Hooid kein ngi ruh sngewtynnat kein ia phi..” La ban ktien lem sa i Lok u Maheh
Kham shiphang i Lydia i la wanrah sha hangta.
“Mama, phi la wan mo..” La kren sa i Lydia
“Hooid kein… Nga wan noh myn dang lap por..” La ong u Rangbah Shnong
“Phi pat lah da kloi ban theh sha ..” La ong pat u Rangbah Shnong
“Dih kein, ngi ruh dang shu dep dih myntan hi ba phi wan..” La ong i Kmie ka Lydia.
U Maheh u ialam ban shim ia ka sha bad ruh u wer ruh ia u Rangbah Shnong ban dih noh. Kumta ki sdang artat ban ia pur khana. [yn dang bteng]
Phi don ban ong eiei?