S.K.N
[ba bteng] “To Rangbah Shnong…” La jubab kita ki Rangbah. Ka khubor bajah u khun u Bah Shanbor ka la bna ir hapoh shnong. I Kong Lumspah i la iam sngewsih bad kumjuh ruh kita ki khun jong ka kiba don ha iing ki la iam lang bad ka Kmie. Ki paramarjan ki la wan ban pyntngen ia ki. U Bah Shanbor u la suba jur ba la dei beit hi na ka iing u Bah Let.
Hynrei watla katta ruh u sngap jak bad pynap ia ka ain ba kan trei kam. Kiba leit wad ki la rung ki khlaw ki btap, ki krem ki kroh ki riat ki ram kiba don ha sawdong pud jong ka shnong. Kiwei don kiba pyrshang ban leit wad wat sha ki iing briew hapoh shnong. Don ki paralok u Bah Shanbor lei lei kiba leit wad beit beit sha iing kur jong u Bah Let, namar ki tip bha ia ka jingiashun kaba la jia hapdeng jong ki. Hynrei ka miet ka la sep ei, ym don ba lap ba shem ia uba jah. U Bah Shanbor u la pyntip noh wut wut sha ki pulit bad sha uta u riewsaid. Ha ka step babud, ki pulit ki la wan hiar da ka kynhun bad la shu leit kem beit ia ki dkhot ka iing para khatduh u Bah Let uba dei u Rangbah Shnong. La rah lai ngut ki Rangbah bad Samla na kane ka iing sha thanat. Kaba don ha Nongbah Shillong.
Ka jingiam briew ka la jia ha ka iing para khatduh jong u Bah Let. “Ha kane ka jingjia, la pait arliang ka jingsngew jong ki briew ki ba don hapoh ka shnong . Don kiba shah sha ka liang u Bah Let bad ka iing jong u, don ruh ki ba shah sha ka liang u Bah Shanbor bad i Kong Lumspah. Don ruh kiba shu ieng hapdeng, ki bym shah liang shano shano ruh. Shuh shuh kane ka jingjia ka la pynkyndit jur ia ki nongshong shnong. Hynrei watla ki pulit ki la wan, ka bor shnong ruh ka la pyrshang ban bteng ka jingwad ia u khun ba la jah jong u Bah Shanbor bad i Kong Lumspah. Ka jingiam briew kaba jur ka la jia ruh ha ka iing jong i Kong Lumspah namar wat hadien lai sngi ba wad ia uta uba jah ruh khlem lap dien satia. Uwei u Rangbah uba kyrshan sha u Bah Shanbor u la pynpaw ha iing jong uba jah “Ka kam te kaba eh, ngi ki biej ngim tip shuh la ka ei kaba dei ne ka bym dei… Tangba kane kaba jia imat don beit kaei re kaei sha lyndet.. Hynrei balei kan shu jia khyllah kumne…” “Ka dei Ma, don beit…Tangba ih ka ain kan leh ia kaba don kam…Ki pulit ki la rah ia kito ki nongshun jong kane ka iing …” La bynrap ktien lem sa iwei i Long Kmie “Ki pulit ruh ki la wan tohkit na ka iing jong u Bah Shanbor ia kiei kiei baroh. U Bah Shanbor ruh bad la ka Lok ki la ai bniah bha ia ki jingtip baroh, haduh ka sngi ba ki leit Shillong bad ka jingiohi bad shong Kali lang bad uwei na ki dkhot ka longiing u Rangbah Shnong. Kumta hi hadien ka jingtip ba bniah na ka iing ba mad ia kane ka jingjia, ki Pulit ki la kem noh sa ia u Rangbah Shnong ruh bad rah ia u sha Shillong. “ U Bah Shanbor, ha ka sngi ba saw, u la kiew bak sha sor ban leit iakynduh bad u riewsaid, ban iakren bad u shaphang kaba la jia baroh. Ki briew kiba la wan sngewlem ha iing jong i Kong Lumspah ki la tuid da u paitbah, bad ha kane ka jingjia la iohi ruh ba bun na ki nongshong shnong ki kham ieid pleng ia ka iing i Kong Lumspah bad u Bah Shanbor ban ia u Rangbah Shnong.
Ka shnong ka la kulmar hi thlim. La bna kylleng ia kane ka jingjia lyngba ki kot khubor bad la tuid ki khubor sngewlem bad ki khubor pynrem ban pynioh ia ka hok jong u bajah. “ Kane ka jingjia ka la pyni sha ka pyrthei naduh ka kam iaknieh jaka puta kaba la jia ha kine ki ar tylli ki longiing bad ka la nang pynsuba jur ba khlem pep ka dei beit na ka daw ki nongshun. Haba la poi ha Sor Shillong, u Bah Shanbor u la iakynduh bad u riewsaid. U la iathuh ia baroh kaba jia bad une u riewsaid u la kular ban pynmih pyrthei beit ia ka jingshisha. “Wat khuslai, ka jingshisha kan sa paw bad kiba don kti yn pynshitom tyn eh …” “To khublei shibun eh sahep..”. La ong u Bah Shanbor Ynda la ioh kot na pulit phi sa pyntip sha nga.. Ngan sa leh ma nga ia ka ba donkam baroh..” La ong biang u riewsaid… [yn dang bteng]
Phi don ban ong eiei?