S.K.N
[ba bteng] “Hooid, nga ruh nga sngew iahab ia kata, namar lada neh u juh shi ujuh kam long hi kaba dei” “Ap kan sa poi ka por, u Rangbah Shnong hi te dei ban ioh da uba kham tip kham shai, hynrei te sah bieit sah dum ka shnong ka thaw” la ban ktien u Bah Shanbor Kane ka jingiakren halor kane ka mat ka la iaid bad neh kham slem.
Hadien kata ki la suh sa sha kawei ka phang. Ka jingiashong kai ka la neh jen haduh 11 baje mynmiet. Kata ruh haduh ba uwei napdeng jong ki u pynkynmaw ban peit ia ka por. “Ade ka por te kam long shuh, nga ngan mih noh ki la lyngngoh tharai ha iing katta..” U la ong Kumta baroh baroh ki sa ia khreh ban mih noh. Watla ka jingkhawai ka long sop sop, hynrei ka la poi sha ka tyndong shkor jong ka iing u Rangbah Shnong. U Bah Let bad ki para jong u ki la dom hi sia ia ka jingleh jong u Bah Shanbor. Ha ka janmiet babud, ki la ia shongkai shi iing ban pyrkhat kaei kaba kin leh pyrshah ia ka iing u Bah Bor bad ka Kong Lumspah. Ha ka jingpyrkhat uwei u pyrsa ba la kham heh na ka iing u la kitkhlieh ban leh ei ei kaba sniew ia ki dkhot ka iing u Bah Shanbor la ka long ha kano kano ka dur ruh. Namar ka jingdom bad sngew rem palat wat u Bah Let u Rangbah Shnong ruh u la shaniah ha uta u pyrsa. Ka jingiakren ka kut ha ka jingiatylli kawei ba lada dei ban shong byndi ruh kam pher tangba dei ban ai jingsneng ia u Bah Shanbor ba u la sngew stad palat. Tangba u Bah Shanbor u la ong lypa “Peit kane ka kam ym dei ban tip mano mano ruh.. Tad haduh ban da pyndep ia ka kam”
Lynnong -2
Ki sngi ki taiew ki nangiaid stet. Hapdeng ka jingbunkam na kaba mareh sharum bad shaneng u Bah Shanbor kumjuh u Bah Let, kim ju iakynduh shongkai shuh hadien ka jingjia ba ki iatyngkhuh. Ki lok ki jor ki la bna bad ithuh ba ka jingshun jong ka iing u Bah Let ia ka iing jong u Bah Shanbor ka long kaba la jubor. Hynrei na ka liang ka iing u Bah Shanbor pat kim patiaw eiei shaphang kata. Ka la jia ha kawei ka sngi ba uwei na ki lok u Bah Shanbor u la wan kai khnang mynmiet ha iing jong u.
Ha kane ka jingiashongkai ki la iapur khana shaphang bun kiei kiei. Hynrei ka ba kham kongsan na kata ka khana ka dei halor ka khubor basniew ba uta u lok u iohsngew ba la iathuh harum haneng shaphang ka iing jong u Bah Shanbor. “Kpa Wabok, ngam sngew lah shuh ban shu sngap ha lade, namar nga sngew ieid sngew jan bad phi bad ka iing jong phi, dei kata ka daw ba nga sa pyllait por khnang ban wan mih kumne..” La ong uta u paralok “Kaei mo kata ka basniew ..?” La buh jingkylli u Bah Shanbor ” Phi phim tip Kpa Wanbok, ka iing u Bah Let mynta ki shun bha ia phi baroh shi iing khamtam ia phi…” La iathuh uta u Lok U Bah Shanbor u shu sngap shiphang. Hadien kata u ong “Nga la shu i pher hi ia u naduh kato ka por… Um ju kwah shuh wat ban iakynduh bad nga, shisien ba u iohi ia nga hangno hangno u kiar beit katba lah..” La iathuh sa u Bah Shanbor ” To mynta kum u paralok kaei ka jingai jingmut lem jong phi ia nga na ka bynta kata..” La pan jingmut u Bah Shanbor U Lok u la sngew jakhom khait kumno ban ai jingmut kat ia kata ka kam bah. Hynrei watla katta ruh uta u paralok u la pynpaw la ka jingsngew. “Kpa Wanbok ka jingai jingmut ia nga ha phi na ka bynta ban iada na ka ba sniew ka long ba phin iaid da husiar sumar ia lade…” La pynpaw u Lok “Ka dei kata, nga sngewthuh mynta ka jingma ka ap …” La kubur u Bah Shanbor “Hooid Kpa Wanbok wat leh shngain ka iaid ka ieng namar ngim lah tip, ki nongshun ki tip bha kumno ban peit siar ia phi..” La ban ktien biang uta u Lok. Haduh jan shiteng synnia ki la neh ka jingiashongkai jar jar. Hadien ba la miet palat u Lok u mih noh nangta. [yn dang bteng]
Phi don ban ong eiei?