Stephan Khongwet
Te kaei kane ka Nongbah kaba iaineh?
U Paul u ong ha ka shithi sha ki Hebru (13) lynnong (14) ka dkhot u iathuh kumne:
“Namar ngim don hangne ka Nongbah kaba ieineh, hynrei ngi ia wad ia kata ka ban sa wan”
Ki lok bad ki parabangeit baroh ha ka Kitab Jingpynpaw 21 lynnong (2) ka dkhot u ioannis u iathuh shai u ong kumne: “Bad nga la iohi ia ka nongbah kaba khuid ka Jerusalem ba thymmai ba ka da wan hiar na u Blei na bneng ia kaba la khreh kum ka Nongleit kurim ia kaba la pynbna khnang ia u tnga jong ka”
Kane kein lok ka Nongbah kaba iaineh kaba la wan hiar na u Blei na bneng.
Ha ka dkhot kaba saw (4) u Ioannis u ong biang “Te u Blei un niad noh ia ka jingjaw ummat baroh na ki khmat jong ki bad ka jingiap kan ym long shuh lymne ka jingsngewsih lymne ka jingiam lymne ka jingpang kan ym long shuh, kita kiei kiei kiba mynshuwa ki la leit noh.
Ha kane ka Nongbah ka jingrwai bad ka jingkmen bymjukut shuh kan long kin ioh ka jingsngewbha bad ka jingkmen, ka jingsngewsih ruh bad ka jingud kin phet noh kumba la iathuh ha u Isaiah 35:10. Shuh shuh la iathuh ia ngi ia kane ka Nongbah ha ka dkhot kaba saw Jingpynpaw 21:4 ka lynti bah jong ka ban iaid ha ka, ka la long da ka ksiar ba nylla kum ka iit ba shai lyngba, bad kata ka nongbah kam donkam ia ka sngi lymne ia u bnai ban pynshai ha ka namar ka burom u Blei ka la pynshai ia ka bad ka jingshai jong ka long Uta u Khun Langbrot. Jingpynpaw 21:23.
Te ka jingkylli mynta ka long ia ngi uei u ban ioh leit bsut shapoh kata ka nongbah ba iaineh?
Jingpynpaw 22:14 ka iathuh tang kita kiba la sait ia la ki jainkup kin ioh ka hok ban wan sha Uta u dieng ka jingim bad kin ioh leit bsut da kita ki khyrdop sha kata ka nongbah.
Kum ki bangeit ne kita ki khun Khristan hato ngi la sngew thikna mo ba ngin ioh leit beit ban shong ha kata ka nongbah ba iaineh ynda haba ka jingim hangne ka la kut? Hato ngi la saitkhuid bad pynkhuid ne em ia lade na ka jingbit tngit jong kane ka pyrthei?
Namar ngi iohi ha kane ka Kitab la thoh shai ba tang kita kiba la sait khuid ia la ki jainkup kin ioh ban rung hapoh jong kata ka nongbah.
U Ioannis u iathuh biang u ong Jingpynpaw 7:13 “Te uwei na kita ki Tymmenbasan u la kylli u da ong ha nga. “Kine kiba la kup kita ki jain kup balieh hato ki long kiei bad nangno ki la wan? dkhot (14) ka ong, Te nga la iathuh ha U Ko Kynrad Me tip ma Me. Te U la ong ha nga. kine ki long kita kein kiba wan na kata ka jingjynjar bakhraw bad ki la sait ia kita ki jainkup jong ki bad ki la pynkhuid lieh ia ki ha ka snam jong uta u khun Langbrot. Ki parabangeit baroh lada ngim pat sngew thikna ialade ka por ka la dei eh ba ngin pynthikna noh bad lada ngim pat pynkhuid ialade ka por ka la dawa ba ngin pynkhuid noh mynta mynta hi.
U Paul u ong sha ki Hebru 10:37 namar sa tang shibit eh Uta uba wan un wan bad un ym pyntud.
Ki lok bad ki parabangeit baroh kane ka long ka jingkhot bad ka jingkyntu na ka bynta jong ngi to wat pyneh ia la ki dohnud jong phi kumba ong ka shithi sha ki Hebru 3:15 katba ki dang ong mynta ka sngi lada phin iohsngew ia ka ktien jong u to wat pyneh ia ki dohnud jong phi kumba ha kata ka jingpynkhih bitar.
Sah katno kan long ka jingsuk ka jingkmen ia kita kiba la ioh mad bad ioh shong ha kata ka nongbah ka jong u Blei Jingpynpaw 7:16, ka ong kin ym thngan shuh lymne sliang shuh ymne ka sngi kan ym ioh shoh ha ki. Lymne kano kano ka jingshit dkhot (17) ka ong, “Naba Uta u Khun Langbrot uba hapdeng kata ka khet un sharai ia ki, bad un ialam lynti ia ki sha ki pukri um ka jingim bad u Blei un niad noh ia ka jingjawummat baroh na ki khmat jong ki.
Ki paralok ki parajor hato phim sngew kwah mo ba ngin ioh ban ia leit lang shata ka nongbah kaba dap da ka jingsuk jingkmen kumba nga la dep iathuh hangta ka jingiam bad jinglyniar ym don shuh. Ki jingpang bad jingshitom ym don shuh, ki jingsngewsih bad khuslai baroh la klet lut. Hangta ym don shuh ka jingthngan jingsliang, ym don nongtuh ne lute ym don slap ne erlangthari ym don kam bylla ne kit nong ym don jingeh ne jingjynjar. Ym don shipai ne pulit hangta, namar ym don lehnoh bad riewsniew, kano kano ka bymkhuid kano kano kaba tngit, kano kano kaba ijli, kano kano ka lamler kan ym ioh ban bsut ne rung hapoh jong kata ka ri, hynrei tang kita kein ia kiba la thoh ha kata ka Kitab ka jingim jong uta u Khun Langbrot Jingpynpaw 21:27. Ki para mynsiem kiba kordor eh to ngin iit bad ngin pyrkhat ia la ka jong ka jingim ha kane ka pyrthei namar kane ka pyrthei ba ngi im kam dei kata ka nongbah kaba iaineh, hynrei kaba tang shipor bad tang shi khyllipmat.
Hangne ngi iohsngew ia ka jingud jingiam bad jinglynniar, ngi iohsngew ia ka jingpang bad jingshitom ngi iohsngew ia ki thma bad ki jingiaum snam ba ha rukom hangne ngi mad tang ki jingeh bad jingjynjar, ki jingduk jingkyrduh ngi thngan bad ngi sliang.
Kiei kiei baroh kiba ka khmat jong ngi ka iohi ki long ki bymneh bad ki bym iaineh.
U Jisu u la dep kren shai ha ka Gospel u Loukas 21:33 ka ong “Ka bneng bad ka khyndew kin duh noh, hynrei ki ktien jong Nga kin ym duh noh”.
Kumta, kine kiei kiei baroh kin duh noh bad kin um noh bad yn thang noh kumta la thoh ha ka shithi u Petros (2) 3:10. Shuh shuh Kitab Jingpynpaw 21:5 ka ong, “Te Uta uba shong halor ka khet U la ong ha khmih nga thaw thymmai ia kiei kiei baroh bad u ong to thoh naba kine ki ktien ki long kiba iaineh bad ba shisha”.
Kum ka jingpynkut ia ki khubor nga kwah ban pyni shuh shuh ia kane kawei ka dkhot kaba pynshisha ia ngi na ka shithi u Paul sha ki Philipi 3:20 ka ong, “Namar kata ka jinglong trai shnong jong ngi ka long ha bneng nangta ruh ngi ia ap khmih lynti ia u Nongpynim u Jisu Khrist uba u Trai.
Na ka bynta ka burom u Blei Amen.
Phi don ban ong eiei?