Ka Nguh ka dem kyrpang ha Baniun

Shillong, 20 Nohprah:
Ka Sengbah Ki Nongshat Nongkhein Hynniewskum Hynniew-trep kan pynlong ia ka Ud ka Nam, ka Nguh ka Dem ba kyrpang ha ka 23 tarik Nohprah 2016 ha Baniun por 10 baje mynstep halor ka Nishan, “ieng ka Hok Shikyntien, pat ka pap shibyllien’.
Haba pynlait khu-bor halor kane, u Secretary ka Sengbah u la ong ba ha kane ka jingpynlong ia ka Nguh ka Dem kyrpang ka long kumba ha kine ki sngi, la kumba ka jingsuk ka la jah bad phet sha jngai, katba shaba phai, tang ka huri hura bad ka jingma suda.
“Kam don shuh ka jingiaid beit iaid ryntih ha ka longing longsem, longkur longkha, imlang sahlang, synshar khadar bad ka sain hima sima bad ka Sengbah ka sngewbha shibun halor kane bad kan dem ngon ka swar ka pyrkhat ban kyndat war ia kane ka jingthut jingthynrei ha ka ri bad ka jaitbynriew”, la ong u Secretary.
Halor kane, la khot sngewbha ia ki parakur parakha, parakher paramer, paradoh parasnam ban wan iashim bynta khnang ha katei ka nguh ka dem ba kyrpang, la bynrap ka kyrwoh .